shaKHsiyat

biThā ke kāñdhe pe laa.ī thī raat use

shafaq ne hañs ke kiyā thā istiqbāl

havā ne rāgnī chheḌī fazā meñ giit ghule

sajā ke pattoñ kī thālī meñ os ke jugnū

utārī thī peḌoñ ne aartī us kī

magar bulandī pe aa kar badal ga.e tevar

shikan ġhurūr kī peshānī par jhalakne lagī

nigāh-e-qahr-o-hiqārat se dekhtī sab ko

mizāj garm huā aur garm aur bhī garm

junūn sar meñ faqat maiñ kā hī samāyā rahā

aur is ghamanD meñ vo bhuul baiThā hai

ki us ke pīchhe hī hai shaam kā saayā

zamīñ bulandī kī hotī nahīñ hamvār kabhī

yahāñ pe shaḳhs nahīñ shaḳhsiyat Thahartī hai

biTha ke kandhe pe lai thi raat use

shafaq ne hans ke kiya tha istiqbaal

hawa ne ragni chheDi faza mein git ghule

saja ke patton ki thaali mein os ke jugnu

utari thi peDon ne aarti us ki

magar bulandi pe aa kar badal gae tewar

shikan ghurur ki peshani par jhalakne lagi

nigah-e-qahr-o-hiqarat se dekhti sab ko

mizaj garm hua aur garm aur bhi garm

junun sar mein faqat main ka hi samaya raha

aur is ghamanD mein wo bhul baiTha hai

ki us ke pichhe hi hai sham ka saya

zamin bulandi ki hoti nahin hamwar kabhi

yahan pe shaKHs nahin shaKHsiyat Thaharti hai