sham-e-sahar

dil meñ tapish hai ātash-bajāñ hai

soz-e-darūñ se sho'la-fishāñ hai

jo hāl-e-dil hai sab par 'ayāñ hai

aañsū ravāñ hai girya-kunāñ hai

hichkī hai paiham rang-e-digar hai

bujhne ko shāyad sham'-e-sahar hai

kyā bebasī hai kyā be-kasī hai

jhilmil sī kartī ik raushnī hai

sar dhun rahī hai ik bekalī hai

aur chupke chupke jal-bujh rahī hai

ukhḌī huī sī saañs aa rahī hai

ik aa rahī hai ik jā rahī hai

rah rah ke dil se huuk uTh rahī hai

bechārgī hai aur be-ḳhudī hai

ab ḳhatm terī ye zindagī hai

'irfān kis ko yā āgahī hai

tū ne luTā.e ai sham' tan-man

tujh ko mubārak ye prem bandhan

ai sham'-e-sozāñ bīmār-e-ulfat

rakhtā huuñ maiñ bhī dāġh-e-mohabbat

jal-bujh chuke haiñ armān-o-hasrat

mujh ko bhī shāyad tujh se hai nisbat

merī bhī ab hai terī sī haa.ī

dil kī lagī ab paañv tak aa.ī

dil mein tapish hai aatash-bajaan hai

soz-e-darun se sho'la-fishan hai

jo haal-e-dil hai sab par 'ayan hai

aansu rawan hai girya-kunan hai

hichki hai paiham rang-e-digar hai

bujhne ko shayad sham'-e-sahar hai

kya bebasi hai kya be-kasi hai

jhilmil si karti ek raushni hai

sar dhun rahi hai ek bekali hai

aur chupke chupke jal-bujh rahi hai

ukhDi hui si sans aa rahi hai

ek aa rahi hai ek ja rahi hai

rah rah ke dil se huk uTh rahi hai

bechaargi hai aur be-KHudi hai

ab KHatm teri ye zindagi hai

'irfan kis ko ya aagahi hai

tu ne luTae ai sham' tan-man

tujh ko mubarak ye prem bandhan

ai sham'-e-sozan bimar-e-ulfat

rakhta hun main bhi dagh-e-mohabbat

jal-bujh chuke hain arman-o-hasrat

mujh ko bhi shayad tujh se hai nisbat

meri bhi ab hai teri si hai

dil ki lagi ab panw tak aai