shama

zabt par qudrat hai tujh ko ye ki tū ḳhāmosh hai

tere siine meñ agarche yās-o-ġham kā josh hai

tere ashkoñ se hai zāhir ranj-e-betābī kā haal

bazm meñ jalnā hī terī zindagī kā hai ma.aal

terī dhīmī raushnī meñ hai nihāñ ulfat kā raaz

terī har har saañs hai afsāna-e-soz-o-gudāz

terā jalnā dars hai ahl-e-basīrat ke liye

sham.a tū sham-e-hidāyat hai mohabbat ke liye

sabr kī mahfil meñ ik tū hī hai lazzat-āshnā

zabt-e-rāz-e-ishq meñ ho jaatī hai ḳhud hī fanā

tū na hotī to na hotī bazm-e-ishrat meñ ziyā

tū na hotī to na hotā munkashif rāz-e-fanā

terī hī mamnūn haiñ shāh-o-gadā kī mahfileñ

haiñ tujhī se pur-ziyā shām-e-alam kī manzileñ

tū na hotī to na hotī ḳhāna-e-ishrat meñ dhuum

tere hī dam se to hai kāshāna-e-ġhurbat meñ dhuum

bekasoñ kī qabr par rotī hai rātoñ ko tū hī

aane vaalā jin kī qabroñ par nahīñ hai koī bhī

sach batā ai sham.a kis ke hijr meñ rotī hai tū

kis ke ġham meñ āñsūoñ se apnā muñh dhotī hai tū

kyā tujhe bhī hai kisī kī kam-nigāhī kā gilā

kyā tirī hastī bhī hai yās-o-alam meñ mubtalā

zabt kartī hai jise tū kaun sā vo raaz hai

kis tilism-e-rāz kī ai sham.a tū dam-sāz hai

zabt par qudrat hai tujh ko ye ki tu KHamosh hai

tere sine mein agarche yas-o-gham ka josh hai

tere ashkon se hai zahir ranj-e-betabi ka haal

bazm mein jalna hi teri zindagi ka hai maal

teri dhimi raushni mein hai nihan ulfat ka raaz

teri har har sans hai afsana-e-soz-o-gudaz

tera jalna dars hai ahl-e-basirat ke liye

shama tu sham-e-hidayat hai mohabbat ke liye

sabr ki mahfil mein ek tu hi hai lazzat-ashna

zabt-e-raaz-e-ishq mein ho jati hai KHud hi fana

tu na hoti to na hoti bazm-e-ishrat mein ziya

tu na hoti to na hota munkashif raaz-e-fana

teri hi mamnun hain shah-o-gada ki mahfilen

hain tujhi se pur-ziya sham-e-alam ki manzilen

tu na hoti to na hoti KHana-e-ishrat mein dhum

tere hi dam se to hai kashana-e-ghurbat mein dhum

bekason ki qabr par roti hai raaton ko tu hi

aane wala jin ki qabron par nahin hai koi bhi

sach bata ai shama kis ke hijr mein roti hai tu

kis ke gham mein aansuon se apna munh dhoti hai tu

kya tujhe bhi hai kisi ki kam-nigahi ka gila

kya teri hasti bhi hai yas-o-alam mein mubtala

zabt karti hai jise tu kaun sa wo raaz hai

kis tilism-e-raaz ki ai shama tu dam-saz hai