shart-e-rifaqat

tum mire paas raho saath raho

aur ye ehsās rahe

maiñ ki āzād huuñ jiine ke liye

aur zinda huuñ ḳhud apne andar

apnī hī zaat meñ tābinda huuñ

apnī har saañs pe qabza hai mirā

apnī pākīza tamannāoñ kī takmīl kā haq hai mujh ko

apne ma.asūm se jazbāt kī tarsīl kā haq hai mujh ko

ye zamīñ merī bhī ye dasht-o-chaman mere bhī

sirf āñgan hī nahīñ koh-o-daman mere bhī

māh-o-anjum bhī mire niilā tabaq merā bhī

jitnā un par hai tumhārā vahī haq merā bhī

shart bas ye hai

ki tum saath raho paas raho

merī har marzī meñ shāmil ho tumhārī marzī

merī har saañs kī shāhid hoñ tumhārī sāñseñ

mere har raaz kī hāsil ho tumhārī dhaḌkan

aur ham ek hī zanjīr meñ pā-basta hoñ

tum mere pas raho sath raho

aur ye ehsas rahe

main ki aazad hun jine ke liye

aur zinda hun KHud apne andar

apni hi zat mein tabinda hun

apni har sans pe qabza hai mera

apni pakiza tamannaon ki takmil ka haq hai mujh ko

apne masum se jazbaat ki tarsil ka haq hai mujh ko

ye zamin meri bhi ye dasht-o-chaman mere bhi

sirf aangan hi nahin koh-o-daman mere bhi

mah-o-anjum bhi mere nila tabaq mera bhi

jitna un par hai tumhaara wahi haq mera bhi

shart bas ye hai

ki tum sath raho pas raho

meri har marzi mein shamil ho tumhaari marzi

meri har sans ki shahid hon tumhaari sansen

mere har raaz ki hasil ho tumhaari dhaDkan

aur hum ek hi zanjir mein pa-basta hon