ibtidā se paañv mere munjamid haiñ
aur mere sar kī zīnat
barf kā ik taaj hai
hukmrānī aag kī
chāroñ taraf
sūraj kā phailā raaj hai
ik kashish kī qaid meñ
saarā badan hai
aur musalsal barf meñ
jakḌe hue
pairoñ ko
hukm-e-raqs hai
shart hai ki
barf ko
sar pe sajā kar
raqs bhī kartī rahūñ maiñ
aur kirnoñ kī tapish ko
jazb bhī kartī rahūñ maiñ
kuchh is tarah
ek qatra bhī na pighle
aur mire qadmoñ se lipTī
barf kī pāzeb meñ
jumbish na ho
lekin
vo bajtī bhī rahe
ibtida se panw mere munjamid hain
aur mere sar ki zinat
barf ka ek taj hai
hukmrani aag ki
chaaron taraf
suraj ka phaila raj hai
ek kashish ki qaid mein
sara badan hai
aur musalsal barf mein
jakDe hue
pairon ko
hukm-e-raqs hai
shart hai ki
barf ko
sar pe saja kar
raqs bhi karti rahun main
aur kirnon ki tapish ko
jazb bhi karti rahun main
kuchh is tarah
ek qatra bhi na pighle
aur mere qadmon se lipTi
barf ki pazeb mein
jumbish na ho
lekin
wo bajti bhi rahe
Source:
Asman Aur Bhi Hain (Pg. 36)
-
Author:
Salma Hijab
-
- Year of Publication: 2011
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
