shauq-e-gurezan

dair o ka.aba kā maiñ nahīñ qaa.el

dair o ka.aba ko āstāñ na banā

mujh meñ tū rūh-e-sarmadī mat phūñk

raunaq-e-bazm-e-ārifāñ na banā

dasht-e-zulmāt meñ bhaTakne de

merī rāhoñ ko kahkashāñ na banā

ishrat-e-jahl-o-tīrgī mat chhīn

mahram-e-rāz-e-do-jahāñ na banā

bijliyoñ se jahāñ na ho chashmak

us gulistāñ meñ āshiyāñ na banā

ḳhār-e-chashm-e-harīf rahne de

hirz-e-bāzū-e-dostāñ na banā

merī ḳhud-bīniyāñ na le mujh se

jalva-afroz-e-mahvishāñ na banā

dil-e-sad-pāra-ehavādis ko

taḳhta-e-mashq-e-gul-ruḳhāñ na banā

merī ḳhuddāriyoñ kā ḳhuun na kar

mutrib-e-bazm-e-dil-barāñ na banā

māh-o-anjum se mujh ko kyā nisbat

mujh ko in kā mizāj-dāñ na banā

jis ko apnī ḳhabar nahīñ rahtī

us ko sālār-e-kārvāñ na banā

merī jānib nigāh-e-lutf na kar

ġham ko is darja kāmrāñ na banā

is zamīñ ko zamīñ hī rahne de

is zamīñ ko tū āsmāñ na banā

merī hastī niyāz-o-shauq sahī

is ko unvān-e-dāstāñ na banā

raaz terā chhapā nahīñ saktā

tū mujhe apnā rāz-dāñ na banā

dair o kaba ka main nahin qael

dair o kaba ko aastan na bana

mujh mein tu ruh-e-sarmadi mat phunk

raunaq-e-bazm-e-arifan na bana

dasht-e-zulmat mein bhaTakne de

meri rahon ko kahkashan na bana

ishrat-e-jahl-o-tirgi mat chhin

mahram-e-raaz-e-do-jahan na bana

bijliyon se jahan na ho chashmak

us gulistan mein aashiyan na bana

KHar-e-chashm-e-harif rahne de

hirz-e-bazu-e-dostan na bana

meri KHud-biniyan na le mujh se

jalwa-afroz-e-mahwishan na bana

dil-e-sad-para-ehawadis ko

taKHta-e-mashq-e-gul-ruKHan na bana

meri KHuddariyon ka KHun na kar

mutrib-e-bazm-e-dil-baran na bana

mah-o-anjum se mujh ko kya nisbat

mujh ko in ka mizaj-dan na bana

jis ko apni KHabar nahin rahti

us ko salar-e-karwan na bana

meri jaanib nigah-e-lutf na kar

gham ko is darja kaamran na bana

is zamin ko zamin hi rahne de

is zamin ko tu aasman na bana

meri hasti niyaz-o-shauq sahi

is ko unwan-e-dastan na bana

raaz tera chhapa nahin sakta

tu mujhe apna raaz-dan na bana