shiraaza

reshmī malbūs meñ

vo gul-ruḳhoñ ke qāfile

is rang-o-bū ke shiir meñ

ham ajnabī dil-soḳhta yādoñ ke paiham silsile

mehrāb-e-dar se jhāñktā

saaqī kī chashm-e-mast kā

ruk ruk ke chalnā yaad hai

duniyā-e-būd-o-hast kā

is dāstāñ ke baab meñ

vo sīm-tan sho.ala-ba-jāñ

jin ke ruḳh-e-tābinda se

ye gulsitāñ raushan huā

jin ke lahū se harf bhī

ma.anī kā pairāhan banā

aa.e haiñ ham bhī DhūñDne

un mah-vashoñ ke naqsh-e-pā

āñkhoñ meñ ḳhvāb-e-hijr se

shiddat thī shauq-e-vasl meñ

lahore se shīrāz tak

chashm-e-zadan meñ kaT ga.e

sadiyoñ barābar fāsle

reshmi malbus mein

wo gul-ruKHon ke qafile

is rang-o-bu ke shir mein

hum ajnabi dil-soKHta yaadon ke paiham silsile

mehrab-e-dar se jhankta

saqi ki chashm-e-mast ka

ruk ruk ke chalna yaad hai

duniya-e-bud-o-hast ka

is dastan ke bab mein

wo sim-tan shoala-ba-jaan

jin ke ruKH-e-tabinda se

ye gulsitan raushan hua

jin ke lahu se harf bhi

mani ka pairahan bana

aae hain hum bhi DhunDne

un mah-washon ke naqsh-e-pa

aankhon mein KHwab-e-hijr se

shiddat thi shauq-e-wasl mein

lahore se shiraaz tak

chashm-e-zadan mein kaT gae

sadiyon barabar fasle