shikast-e-zindan ka KHwab

shikast-e-zindāñ kā ḳhvāb maiñ ne kabhī na dekhā ki sach yahī hai

jo beḌiyāñ paañv meñ paḌī haiñ vahī asāsa hai zindagī kā

vahīñ se mere shu.ūr ne pā.īñ āgahī kī na.ī tarañgeñ

vahīñ se iz.hār ke vasīle vahīñ se fan ke na.e taqāze

vahīñ se jiine ke hausle bhī vahīñ se rindī ke valvale bhī

har ek aahaT pe sāneha ik nayā guzartā hai lamha lamha

maiñ chāhatoñ kī naqīb ban kar har ek qaidī se pūchhtī huuñ

mile rihā.ī to kyā karoge jo chhūT jaao to kyā karoge

ki zindagī anginat savāloñ ko sāmne le ke aa ga.ī hai

har ek chehra khulā khulā sā har ek jazba Darā Darā sā

jahāñ meñ jaise haiñ jis jagah haiñ vahīñ se manzil kā rāsta hai

jo beḌiyāñ paañv meñ paḌī haiñ vahī asāsa hai zindagī kā

shikast-e-zindan ka KHwab main ne kabhi na dekha ki sach yahi hai

jo beDiyan panw mein paDi hain wahi asasa hai zindagi ka

wahin se mere shuur ne pain aagahi ki nai tarangen

wahin se izhaar ke wasile wahin se fan ke nae taqaze

wahin se jine ke hausle bhi wahin se rindi ke walwale bhi

har ek aahaT pe saneha ek naya guzarta hai lamha lamha

main chahaton ki naqib ban kar har ek qaidi se puchhti hun

mile rihai to kya karoge jo chhuT jao to kya karoge

ki zindagi anginat sawalon ko samne le ke aa gai hai

har ek chehra khula khula sa har ek jazba Dara Dara sa

jahan mein jaise hain jis jagah hain wahin se manzil ka rasta hai

jo beDiyan panw mein paDi hain wahi asasa hai zindagi ka