shikast

ghane daraḳht ke saa.e meñ kaun baiThā hai

tasavvurāt kī sau mish.aleñ jalā.e hue

riyāz-o-fikr kī lahreñ javān chehre par

siyāh zulf mashiyyat kā dil churā.e hue

ye iztirāb ki andar kā dil dhaḌaktā hai

ye irti.āsh ki kohsār thartharā.e hue

ye aadmī na kahīñ zabt-e-zindagī sah kar

mujhī se chhīn le mere kañval jalā.e hue

kaho kaho kisī rañgīn tītarī se kaho

ki apne hoñToñ pe naġhmoñ kā baar uThā.e hue

zamīñ kī samt ravāna ho bijliyoñ kī tarah

jalā ke raakh hī kar de mahal banā.e hue

vo menkā ne fazāoñ meñ raag chheḌā hai

vo ghuñgrūoñ kī sadā.eñ zamīñ uThā.e hue

rishī kī āñkhoñ meñ us rāgnī se diip chale

laboñ se khīñch liyā ras nazar milā.e hue

sunā hai aaj bhī andar kā taḳht baaqī hai

vahī haiñ rañg-mahal ab bhī jagmagā.e hue

magar abhī mire māthe pe nuur raqsāñ hai

mirī shikast se parvardigār larzāñ hai

ghane daraKHt ke sae mein kaun baiTha hai

tasawwuraat ki sau mishalen jalae hue

riyaz-o-fikr ki lahren jawan chehre par

siyah zulf mashiyyat ka dil churae hue

ye iztirab ki andar ka dil dhaDakta hai

ye irtiash ki kohsar thartharae hue

ye aadmi na kahin zabt-e-zindagi sah kar

mujhi se chhin le mere kanwal jalae hue

kaho kaho kisi rangin titari se kaho

ki apne honTon pe naghmon ka bar uThae hue

zamin ki samt rawana ho bijliyon ki tarah

jala ke rakh hi kar de mahal banae hue

wo meinka ne fazaon mein rag chheDa hai

wo ghungruon ki sadaen zamin uThae hue

rishi ki aankhon mein us ragni se dip chale

labon se khinch liya ras nazar milae hue

suna hai aaj bhi andar ka taKHt baqi hai

wahi hain rang-mahal ab bhi jagmagae hue

magar abhi mere mathe pe nur raqsan hai

meri shikast se parwardigar larzan hai