shikwa-e-muKHtasar

mujhe shikva nahīñ duniyā kī un zohra-jabīnoñ se

huī jin se na mere shauq-e-rusvā kī pazīrā.ī

mujhe shikva nahīñ un paak bātin nukta-chīnoñ se

lab-e-mojiz-numā ne jin ke mujh par aag barsā.ī

mujhe shikva nahīñ tahzīb ke un pāsbānoñ se

na lene dī jinhoñ ne fitrat-e-shā.ir ko añgḌā.ī

mujhe shikva nahīñ dair-o-haram ke āstānoñ se

vo jin ke dar pe kī hai muddatoñ maiñ ne jabīñ-sā.ī

mujhe shikva nahīñ uftādagān-e-aish-o-ishrat se

vo jin ko mere hāl-e-zār par aksar hañsī aa.ī

mujhe shikva nahīñ un sāhibān-e-jāh-o-sarvat se

nahīñ aatī mire hissa meñ jin kī ek bhī paa.ī

zamāne ke nizām-e-zañg-ālūda se shikva hai

qavānīn-e-kuhan ā.īn-e-farsūda se shikva hai

mujhe shikwa nahin duniya ki un zohra-jabinon se

hui jin se na mere shauq-e-ruswa ki pazirai

mujhe shikwa nahin un pak baatin nukta-chinon se

lab-e-mojiz-numa ne jin ke mujh par aag barsai

mujhe shikwa nahin tahzib ke un pasbanon se

na lene di jinhon ne fitrat-e-shair ko angDai

mujhe shikwa nahin dair-o-haram ke aastanon se

wo jin ke dar pe ki hai muddaton main ne jabin-sai

mujhe shikwa nahin uftadagan-e-aish-o-ishrat se

wo jin ko mere haal-e-zar par aksar hansi aai

mujhe shikwa nahin un sahiban-e-jah-o-sarwat se

nahin aati mere hissa mein jin ki ek bhi pai

zamane ke nizam-e-zang-aluda se shikwa hai

qawanin-e-kuhan aain-e-farsuda se shikwa hai