shorish-e-junun

bahār aa.ī hai shorish hai junūn-e-fitna-sāmāñ kī

ilāhī ḳhair rakhnā tū mire jaib-o-garebāñ kī

bhalā jazbāt-e-ulfat bhī kahīñ miTne se miTte haiñ

abas haiñ dhamkiyāñ dār-o-rasan kī aur zindāñ kī

vo gulshan jo kabhī āzād thā guzre zamāne meñ

maiñ huuñ shāḳh-e-shikasta yaañ usī ujḌe gulistāñ kī

nahīñ tum se shikāyat ham-safīrān-e-chaman mujh ko

mirī taqdīr hī meñ thā qafas aur qaid zindāñ kī

zamīñ dushman zamāñ dushman jo apne the parā.e haiñ

sunoge dāstāñ kyā tum mire hāl-e-pareshāñ kī

ye jhagḌe aur bakheḌe meT kar aapas meñ mil jaao

abas tafrīq hai tum meñ ye hindū aur musalmāñ kī

sabhī sāmān-e-ishrat the maze se apnī kaTtī thī

vatan ke ishq ne ham ko havā khilvā.ī zindāñ kī

bi-hamdillah chamak uTThā sitāra merī qismat kā

ki taqlīd-e-haqīqī kī atā shāh-e-shahīdāñ kī

udhar ḳhauf-e-ḳhizāñ hai āshiyāñ kā ġham idhar dil ko

hameñ yaksāñ hai tafrīh-e-chaman aur qaid zindāñ kī

bahaar aai hai shorish hai junun-e-fitna-saman ki

ilahi KHair rakhna tu mere jaib-o-gareban ki

bhala jazbaat-e-ulfat bhi kahin miTne se miTte hain

abas hain dhamkiyan dar-o-rasan ki aur zindan ki

wo gulshan jo kabhi aazad tha guzre zamane mein

main hun shaKH-e-shikasta yan usi ujDe gulistan ki

nahin tum se shikayat ham-safiran-e-chaman mujh ko

meri taqdir hi mein tha qafas aur qaid zindan ki

zamin dushman zaman dushman jo apne the parae hain

sunoge dastan kya tum mere haal-e-pareshan ki

ye jhagDe aur bakheDe meT kar aapas mein mil jao

abas tafriq hai tum mein ye hindu aur musalman ki

sabhi saman-e-ishrat the maze se apni kaTti thi

watan ke ishq ne hum ko hawa khilwai zindan ki

bi-hamdillah chamak uTTha sitara meri qismat ka

ki taqlid-e-haqiqi ki ata shah-e-shahidan ki

udhar KHauf-e-KHizan hai aashiyan ka gham idhar dil ko

hamein yaksan hai tafrih-e-chaman aur qaid zindan ki