sin-e-yas

'ajīb sī ittilā' thī vo

jise maiñ ḳhud se na jaane kab se chhupā rahī thī

'ajab ḳhabar thī ki jis kī bābat

maiñ ḳhud se sach bolte hue hichkichā rahī thī

'ajīb dukh thā ki jiskā ehsās jāgte hī

maiñ apne mahram se

apne hamdam se aise nazreñ churā rahī thī

ki jaise mujh meñ kahīñ koī jurm ho gayā ho

'ajab ḳhabar thī

jise mirā dil qubūl karne se munharif thā

magar haqīqat kā mo'tarif thā

ki shāḳh-e-jāñ par gulāb khilne ke mausamoñ ko

vidā' kahne kī sā'ateñ ab qarīb-tar haiñ

qarīb-tar hai ki ḳhushk ho jā.eñge vo sote

ki jin kī tah meñ

hazār taḳhlīq ke ḳhazāne chhupe hue the

vo āb-e-haivāñ

vo imbisāt-o-hayāt kā be-kanār dariyā

ki dafn ho jā.egā ḳhas-o-ḳhāk-e-roz-o-shab meñ

yahāñ se ‘umr-e-gurez-pā jo nikal paḌī aur rāste par

to sochtī huuñ ki jaate jaate

maiñ apne ḳhāliq se ye to pūchhūñ

ḳhudā-e-sattār

‘ismatoñ ko hazār pardoñ meñ rakhne vaale

sifāt meñ terī 'adl bhī hai

to phir mire aur mere mahram ke biich tafrīq kā sabab kyā

vujūd kī kīmiyā-garī meñ

ye bāñjh-pan kā 'itāb tanhā mire liye kyoñ

ye ḳhushk-sālī kā aisā e’lān-e-ḳhās

qaht-e-numū kā 'uryāñ 'azāb tanhā mire liye kyoñ

ai mere sattār-o-kīmiyā-gar

ye roz-o-shab kā hisāb tanhā mire liye kyoñ

'ajib si ittila' thi wo

jise main KHud se na jaane kab se chhupa rahi thi

'ajab KHabar thi ki jis ki babat

main KHud se sach bolte hue hichkicha rahi thi

'ajib dukh tha ki jiska ehsas jagte hi

main apne mahram se

apne hamdam se aise nazren chura rahi thi

ki jaise mujh mein kahin koi jurm ho gaya ho

'ajab KHabar thi

jise mera dil qubul karne se munharif tha

magar haqiqat ka mo'tarif tha

ki shaKH-e-jaan par gulab khilne ke mausamon ko

wida' kahne ki sa'aten ab qarib-tar hain

qarib-tar hai ki KHushk ho jaenge wo sote

ki jin ki tah mein

hazar taKHliq ke KHazane chhupe hue the

wo aab-e-haiwan

wo imbisat-o-hayat ka be-kanar dariya

ki dafn ho jaega KHas-o-KHak-e-roz-o-shab mein

yahan se ‘umr-e-gurez-pa jo nikal paDi aur raste par

to sochti hun ki jate jate

main apne KHaliq se ye to puchhun

KHuda-e-sattar

‘ismaton ko hazar pardon mein rakhne wale

sifat mein teri 'adl bhi hai

to phir mere aur mere mahram ke bich tafriq ka sabab kya

wujud ki kimiya-gari mein

ye banjh-pan ka 'itab tanha mere liye kyon

ye KHushk-sali ka aisa e’lan-e-KHas

qaht-e-numu ka 'uryan 'azab tanha mere liye kyon

ai mere sattar-o-kimiya-gar

ye roz-o-shab ka hisab tanha mere liye kyon