siyah jhaDiyan ab bhi muntazir hain

yahīñ se guzrā thā

kārvān-e-shīsha-garāñ

tum ko mā'lūm hai pā-shikasta raahī

darāz ūñToñ pe phūTtī shu’ā’eñ

sabz laal niilī rū-pahlī aage

darāz-qad shīshagar sārbāñ

tamkanat se mahār thāme

vo kārvāñ to manzil se jā milā hai

sārbāñ

mahmil pe jalva-afroz haiñ darāz

ūñToñ pe un ke darāz-qad

ab darāz-tar haiñ

matā'-e-shīsha-garī

chūr-chūr bikhrī hai rāhoñ meñ

reza-reza

havā meñ tahlīl ho ga.ī hai

udaas raahī

tum jo pā-barahna nikle the dhartī ke lams kī aarzū meñ

chanchal havā kī āġhosh meñ zindagī kī asaas paane

dekho

tumhāre qadam lahūluhān haiñ havā ke bose tumhāre

tishna-laboñ ko majrūh kar rahe haiñ

vo kaun haiñ kyā tumhāre sāthī haiñ vo jinhoñ ne

us shāhrāh se zarā haT kar rangīn plastic ke

ḳheme lagā liye haiñ vo kaun haiñ jo plastic ke

dabīz malbūs meñ plastic kī naqābeñ juute

is dhaj se zaḳhmī zamīn ke siine par gāmzan haiñ

shikasta raahī

jo ho sake to pāgal havā se pūchho

siyāh jhāḌiyoñ meñ kitne figār jism

vo sab jo nikle the dhartī ke lams kī aarzū meñ

jo ho sake to zaḳhmī havā ke siine pe ab

yā figār dhartī pe apne lahū se tum apnā naam likh do

siyāh jhāḌiyāñ ab bhī muntazir haiñ

yahin se guzra tha

karwan-e-shisha-garan

tum ko ma'lum hai pa-shikasta rahi

daraaz unTon pe phuTti shu’a’en

sabz lal nili ru-pahli aage

daraaz-qad shishagar sarban

tamkanat se mahaar thame

wo karwan to manzil se ja mila hai

sarban

mahmil pe jalwa-afroz hain daraaz

unTon pe un ke daraaz-qad

ab daraaz-tar hain

mata'-e-shisha-gari

chur-chur bikhri hai rahon mein

reza-reza

hawa mein tahlil ho gai hai

udas rahi

tum jo pa-barahna nikle the dharti ke lams ki aarzu mein

chanchal hawa ki aaghosh mein zindagi ki asas pane

dekho

tumhaare qadam lahuluhan hain hawa ke bose tumhaare

tishna-labon ko majruh kar rahe hain

wo kaun hain kya tumhaare sathi hain wo jinhon ne

us shahrah se zara haT kar rangin plastic ke

KHeme laga liye hain wo kaun hain jo plastic ke

dabiz malbus mein plastic ki naqaben jute

is dhaj se zaKHmi zamin ke sine par gamzan hain

shikasta rahi

jo ho sake to pagal hawa se puchho

siyah jhaDiyon mein kitne figar jism

wo sab jo nikle the dharti ke lams ki aarzu mein

jo ho sake to zaKHmi hawa ke sine pe ab

ya figar dharti pe apne lahu se tum apna nam likh do

siyah jhaDiyan ab bhi muntazir hain