aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

subh ki aamad

Ismail Merathi

subh ki aamad

Ismail Merathi

MORE BYIsmail Merathi

    ḳhabar din ke aane maiñ rahī huuñ

    ujālā zamāne meñ phailā rahī huuñ

    bahār apnī mashriq se dikhlā rahī huuñ

    pukāre gale saaf chillā rahī huuñ

    uTho sone vaalo ki maiñ aa rahī huuñ

    maiñ sab kār-behvār ke saath aa.ī

    maiñ raftār o guftār ke saath aa.ī

    maiñ bājoñ jhankār ke saath aa.ī

    maiñ chiḌiyoñ chahkār ke saath aa.ī

    uTho sone vaalo ki maiñ aa rahī huuñ

    azaañ par azaañ murġh dene lagā

    ḳhushī se har ik jānvar boltā hai

    daraḳhtoñ ke uupar ajab chahchahā hai

    suhānā hai vaqt aur ThanDī havā hai

    uTho sone vaalo ki maiñ aa rahī huuñ

    ye chiḌiyāñ jo peḌoñ pe haiñ ġhul machātī

    udhar se udhar uḌ ke haiñ aatī jaatī

    damoñ ko hilātī paroñ ko phulātī

    mirī aamad aamad ke haiñ giit gaatī

    uTho sone vaalo ki maiñ aa rahī huuñ

    jo tote ne bāġhoñ meñ Teñ Teñ machā.ī

    to bulbul bhī gulshan meñ hai chahchahāī

    aur ūñchī muñDeroñ pe shamā bhī gaa.ī

    maiñ sau sau tarah de rahī huuñ duhā.ī

    uTho sone vaalo ki maiñ aa rahī huuñ

    har ek baaġh ko maiñ ne mahkā diyā hai

    nasīm aur sabā ko bhī lahkā diyā hai

    chaman surḳh phūloñ se dahkā diyā hai

    magar niiñd ne tum ko bahkā diyā hai

    uTho sone vaalo ki maiñ aa rahī huuñ

    huī mujh se raunaq pahāḌ aur ban meñ

    har ek mulk meñ des meñ har vatan meñ

    khilātī huī phuul aa.ī chaman meñ

    bujhātī chalī sham.a ko anjuman meñ

    uTho sone vaalo ki maiñ aa rahī huuñ

    jo is vaqt jañgal meñ buuTī jaḌī hai

    so vo nau-lakhā haar pahne khaḌī hai

    ki pichhle ThanDak se shabnam paḌī hai

    ajab ye samāñ hai ajab ye ghaḌī hai

    uTho sone vaalo ki maiñ aa rahī huuñ

    hiran chauñk uThe chaukḌī bhar rahe haiñ

    kiloleñ hare khet meñ kar rahe haiñ

    nadī ke kināre khaḌe char haiñ

    ġharaz mere jalve pe sab mar rahe haiñ

    uTho sone vaalo ki maiñ aa rahī huuñ

    meñ tāroñ chhāñ aan pahuñchī yahāñ tak

    zamīñ se hai jalva mirā āsmāñ tak

    mujhe pāoge dekhte ho jahāñ tak

    karoge bhalā kāhilī tum kahāñ tak

    uTho sone vaalo ki maiñ aa rahī huuñ

    pujārī ko mandir ke maiñ ne jagāyā

    muazzin ko masjid ke maiñ ne uThāyā

    bhaTakte musāfir ko rasta batāyā

    añdherā ghaTāyā ujālā baḌhāyā

    uTho sone vaalo ki maiñ aa rahī huuñ

    lade qāfiloñ ke bhī manzil meñ Dere

    kisānoñ ke hal chal paḌe muñh-añdhere

    chale jaal kañdhe pe le kar machhere

    daladdar hue duur aa.e se mere

    uTho sone vaalo ki maiñ aa rahī huuñ

    bigul aur tañbūr sañkh aur naubat

    bajāne lage apnī apnī sabhī gat

    chalī top bhī din se hazrat salāmat

    nahīñ ḳhvāb-e-ġhaflat nahīñ ḳhvāb-e-ġhaflat

    uTho sone vaalo ki maiñ aa rahī huuñ

    lo hoshyār ho jaao aur aañkh kholo

    na lo karvaTeñ aur na bistar TaTolo

    ḳhudā ko karo yaad aur muñh se bolo

    bas ab ḳhair se uTh ke muñh haath dho lo

    uTho sone vaalo ki maiñ aa rahī huuñ

    baḌī dhuum se aa.ī merī savārī

    jahāñ meñ huā ab mirā hukm jaarī

    sitāre chhupe raat añdherī sidhārī

    dikhā.ī diye baaġh aur khet kyārī

    uTho sone vaalo ki maiñ aa rahī huuñ

    KHabar din ke aane ki main la rahi hun

    ujala zamane mein phaila rahi hun

    bahaar apni mashriq se dikhla rahi hun

    pukare gale saf chilla rahi hun

    uTho sone walo ki main aa rahi hun

    main sab kar-behwar ke sath aai

    main raftar o guftar ke sath aai

    main bajon ki jhankar ke sath aai

    main chiDiyon ki chahkar ke sath aai

    uTho sone walo ki main aa rahi hun

    azan par azan murgh dene laga

    KHushi se har ek jaanwar bolta hai

    daraKHton ke upar ajab chahchaha hai

    suhana hai waqt aur ThanDi hawa hai

    uTho sone walo ki main aa rahi hun

    ye chiDiyan jo peDon pe hain ghul machati

    udhar se udhar uD ke hain aati jati

    damon ko hilati paron ko phulati

    meri aamad aamad ke hain git gati

    uTho sone walo ki main aa rahi hun

    jo tote ne baghon mein Ten Ten machai

    to bulbul bhi gulshan mein hai chahchahai

    aur unchi munDeron pe shama bhi gai

    main sau sau tarah de rahi hun duhai

    uTho sone walo ki main aa rahi hun

    har ek bagh ko main ne mahka diya hai

    nasim aur saba ko bhi lahka diya hai

    chaman surKH phulon se dahka diya hai

    magar nind ne tum ko bahka diya hai

    uTho sone walo ki main aa rahi hun

    hui mujh se raunaq pahaD aur ban mein

    har ek mulk mein des mein har watan mein

    khilati hui phul aai chaman mein

    bujhati chali shama ko anjuman mein

    uTho sone walo ki main aa rahi hun

    jo is waqt jangal mein buTi jaDi hai

    so wo nau-lakha haar pahne khaDi hai

    ki pichhle ki ThanDak se shabnam paDi hai

    ajab ye saman hai ajab ye ghaDi hai

    uTho sone walo ki main aa rahi hun

    hiran chaunk uThe chaukDi bhar rahe hain

    kilolen hare khet mein kar rahe hain

    nadi ke kinare khaDe char hain

    gharaz mere jalwe pe sab mar rahe hain

    uTho sone walo ki main aa rahi hun

    mein taron ki chhan aan pahunchi yahan tak

    zamin se hai jalwa mera aasman tak

    mujhe paoge dekhte ho jahan tak

    karoge bhala kahili tum kahan tak

    uTho sone walo ki main aa rahi hun

    pujari ko mandir ke main ne jagaya

    muazzin ko masjid ke main ne uThaya

    bhaTakte musafir ko rasta bataya

    andhera ghaTaya ujala baDhaya

    uTho sone walo ki main aa rahi hun

    lade qafilon ke bhi manzil mein Dere

    kisanon ke hal chal paDe munh-andhere

    chale jal kandhe pe le kar machhere

    daladdar hue dur aae se mere

    uTho sone walo ki main aa rahi hun

    bigul aur tanbur sankh aur naubat

    bajaane lage apni apni sabhi gat

    chali top bhi din se hazrat salamat

    nahin KHwab-e-ghaflat nahin KHwab-e-ghaflat

    uTho sone walo ki main aa rahi hun

    lo hoshyar ho jao aur aankh kholo

    na lo karwaTen aur na bistar TaTolo

    KHuda ko karo yaad aur munh se bolo

    bas ab KHair se uTh ke munh hath dho lo

    uTho sone walo ki main aa rahi hun

    baDi dhum se aai meri sawari

    jahan mein hua ab mera hukm jari

    sitare chhupe raat andheri sidhaari

    dikhai diye bagh aur khet kyari

    uTho sone walo ki main aa rahi hun

    Source:

    intekhab-e-sukhan (Pg. 49)

    • Author: Ibne Kanwal
      • Edition: 2005-2008
      • Publisher: Kitabi Duniya
      • Year of Publication: 2005-2008
    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY

    Jashn-e-Rekhta | 8-9-10 December 2023 - Major Dhyan Chand National Stadium, Near India Gate - New Delhi

    GET YOUR PASS
    Speak Now