sultani

kise ḳhabar ki hazāroñ maqām rakhtā hai

vo faqr jis meñ hai be-parda rūh-e-qurānī

ḳhudī ko jab nazar aatī hai qāhirī apnī

yahī maqām hai kahte haiñ jis ko sultānī

yahī maqām hai momin kī quvvatoñ kā 'iyār

isī maqām se aadam hai zill-e-sub.hānī

ye jabr-o-qahr nahīñ hai ye 'ishq-o-mastī hai

ki jabr-o-qahr se mumkin nahīñ jahāñbānī

kiyā gayā hai ġhulāmī meñ mubtalā tujh ko

ki tujh se ho na sakī faqr kī nigahbānī

misāl-e-māh chamaktā thā jis kā dāġh-e-sujūd

ḳharīd lī hai farañgī ne vo musalmānī

huā harīf mah-o-āftāb tū jis se

rahī na tere sitāroñ meñ vo daraḳhshānī

kise KHabar ki hazaron maqam rakhta hai

wo faqr jis mein hai be-parda ruh-e-qurani

KHudi ko jab nazar aati hai qahiri apni

yahi maqam hai kahte hain jis ko sultani

yahi maqam hai momin ki quwwaton ka 'iyar

isi maqam se aadam hai zill-e-subhani

ye jabr-o-qahr nahin hai ye 'ishq-o-masti hai

ki jabr-o-qahr se mumkin nahin jahanbani

kiya gaya hai ghulami mein mubtala tujh ko

ki tujh se ho na saki faqr ki nigahbani

misal-e-mah chamakta tha jis ka dagh-e-sujud

KHarid li hai farangi ne wo musalmani

hua harif mah-o-aftab tu jis se

rahi na tere sitaron mein wo daraKHshani