suraj ka alamiya

mire pīchhe bahut pīchhe

mire maazī ke lambe ġhaar meñ sāñpoñ kā Derā hai

jahāñ pur-haul haibatnāk bhūtoñ kā baserā hai

mire aage bahut aage

mirā rañgīn mustaqbil hai ik phūloñ kī vaadī hai

ki jis kī god meñ ḳhvāboñ kī alhaḌ shāhzādī hai

mire pīchhe

añdhere ġhaar haiñ makḌī ke jaale haiñ

mire aage

sunahre ḳhvāb haiñ kirnoñ ke haale haiñ

maiñ sargarm-e-safar huuñ apnī manzil kī taraf lekin

mirī baḌhtī huī vahshat kā aalam koī kyā jaane

ye lamhe haañ yahī uḌte hue lamhe na haath aa.e

ujaḌ kar rah ga.e ḳhush-rañg ḳhvāboñ ke sanam-ḳhāne

maiñ apne hī lahū kī aag meñ jaltā rahā barsoñ

khanakte hī rahe har bazm har mahfil meñ paimāne

maiñ apne daur kā mahr-e-daraḳhshāñ huuñ magar phir bhī

ye andhā vaqt shāyad umr bhar mujh ko na pahchāne

ye andhā vaqt shāyad umr bhar mujh ko na pahchāne

mere pichhe bahut pichhe

mere mazi ke lambe ghaar mein sanpon ka Dera hai

jahan pur-haul haibatnak bhuton ka basera hai

mere aage bahut aage

mera rangin mustaqbil hai ek phulon ki wadi hai

ki jis ki god mein KHwabon ki alhaD shahzadi hai

mere pichhe

andhere ghaar hain makDi ke jale hain

mere aage

sunahre KHwab hain kirnon ke haale hain

main sargarm-e-safar hun apni manzil ki taraf lekin

meri baDhti hui wahshat ka aalam koi kya jaane

ye lamhe han yahi uDte hue lamhe na hath aae

ujaD kar rah gae KHush-rang KHwabon ke sanam-KHane

main apne hi lahu ki aag mein jalta raha barson

khanakte hi rahe har bazm har mahfil mein paimane

main apne daur ka mahr-e-daraKHshan hun magar phir bhi

ye andha waqt shayad umr bhar mujh ko na pahchane

ye andha waqt shayad umr bhar mujh ko na pahchane