surur

dekh ke tujh ko ye aatā hai ki likkhūñ maiñ ġhazal

sochtā huuñ maiñ yahī phir ki zarūrat kyā hai

husn pe tere ye ra.anā.ī tirī shaan jo hai

ye tirī zulfoñ meñ ḳham jo hai sarāpe kī shabīh

tere nainoñ kī kajī jo hai adāoñ pe uruuj

surḳhī-e-lab ki jo mazbah hai tamannāoñ kā

terā joban ki jo sharminda-e-sad-fitna hai

sukr ye tere huzūrī kā bayāñ kaise ho

jis kī mastī meñ muqayyad haiñ sabhī ke az.hān

sher-o-naġhme isī sarshārī ke do-gāne haiñ

tum to ḳhud hī ho ġhazal jis pe taġhazzul hai nisār

aur use paḌhnā jo chāhūñ to na is kā itmām

aur lafzoñ meñ utārūñ to har ik lafz surūr

dekh ke tujh ko ye aata hai ki likkhun main ghazal

sochta hun main yahi phir ki zarurat kya hai

husn pe tere ye ranai teri shan jo hai

ye teri zulfon mein KHam jo hai sarape ki shabih

tere nainon ki kaji jo hai adaon pe uruj

surKHi-e-lab ki jo mazbah hai tamannaon ka

tera joban ki jo sharminda-e-sad-fitna hai

sukr ye tere huzuri ka bayan kaise ho

jis ki masti mein muqayyad hain sabhi ke azhan

sher-o-naghme isi sarshaari ke do-gane hain

tum to KHud hi ho ghazal jis pe taghazzul hai nisar

aur use paDhna jo chahun to na is ka itmam

aur lafzon mein utarun to har ek lafz surur