sukhe jazire ki dua

mahsūr huuñ paanī se maiñ

par tishnagī se chuur huuñ

merā vajūd ik jaam hai jām-e-tahī

ḳhandāñ haiñ jis ke chār-sū

mai se bhare miinā subū

pahlī kiran phūTī ki ik karb-e-nihāñ

jaag uThtā hai letā huā añgḌā.iyāñ

din jaise jaise hotā jaatā hai javāñ

jvālā-mukhī sā khaulne lagtā hai siine kā lahū

maiñ ik sulagtī aarzū maiñ ek taptī zindagī

pahnā-e-imkānāt meñ jaulāñ bagūloñ kī tarah

sar-gashta apne hī ḳhayāloñ ke hayūloñ kī tarah

ḳhanjar chalātī hai mire paikar pe bād-e-ātishīñ

maiñ ik gadā

shādābiyoñ ke chand TukḌoñ chand sikkoñ ke liye

dāman pasāre ruuh kā

leTā huuñ farsh-e-ḳhāk par kab se

mujhe ḳhud bhī nahīñ koī pata

naḳhloñ kī ThanDī chhāñv kā pyāsā huuñ maiñ

apne vajūd-e-ḳhushk kā huuñ nauha-ḳhvāñ

lekin mirī palkoñ pe aañsū tak nahīñ

ai bādalo bach-bach ke jaate bādalo

paanī na do aañsū to do

mahsur hun pani se main

par tishnagi se chur hun

mera wajud ek jam hai jam-e-tahi

KHandan hain jis ke chaar-su

mai se bhare mina subu

pahli kiran phuTi ki ek karb-e-nihan

jag uThta hai leta hua angDaiyan

din jaise jaise hota jata hai jawan

jwala-mukhi sa khaulne lagta hai sine ka lahu

main ek sulagti aarzu main ek tapti zindagi

pahna-e-imkanat mein jaulan bagulon ki tarah

sar-gashta apne hi KHayalon ke hayulon ki tarah

KHanjar chalati hai mere paikar pe baad-e-atishin

main ek gada

shadabiyon ke chand TukDon chand sikkon ke liye

daman pasare ruh ka

leTa hun farsh-e-KHak par kab se

mujhe KHud bhi nahin koi pata

naKHlon ki ThanDi chhanw ka pyasa hun main

apne wajud-e-KHushk ka hun nauha-KHwan

lekin meri palkon pe aansu tak nahin

ai baadalo bach-bach ke jate baadalo

pani na do aansu to do