suraj ki bimari

to aao chaleñ ab ghar chalte haiñ

din kī thakan ab shaam huī hai

sūraj ko apne gahvāre meñ so jaane do

vo bahut thakā huā hai

sūraj kī bīmārī ne ham sab ko thakā diyā hai

kyā jaane kal kyā hogā

kal to andeshe ko kahte haiñ

dekho ham kitne andeshoñ se guzre haiñ aur zinda haiñ

us ne kahā thā zinda raho

aThārah baras

aThārah baras jo niiñd kī sāñseñ ban kar guzar ga.e

aur ab jaltī āñkhoñ kī bedārī vo hāsil hai

jo lā-hāsil hai

maiñ apnī saarī nīñdeñ bhuul gayā huuñ

ham sab apne ḳhvāboñ kā saudā kar ke jiinā bhuul chuke haiñ

us ne kahā thā zinda raho

jaise zinda rahnā mere bas meñ hai

vo sachchī thī lekin maiñ ne us ko jhūTā samjhā thā

Thahro mujh ko darvāza kholne do

ghar kī dīvāroñ par vīrānī hai

maiñ aaj tumhāre saath sahar tak jāgūñgā

donoñ khā kar gappeñ hāñkeñge

merī mez pe

fāqa-kash ummīdeñ

vo rūkhī-sūkhī khātī haiñ

jo māyūsī se bach jaatī haiñ

mere bistar par be-ḳhvābī karvaTeñ letī hai

us ne kahā thā zinda raho

kyā zinda rahnā mere bas meñ hai

maiñ to sāñseñ gin gin kar

apnī gum-gashta ummīdoñ ko

note-bōkoñ maiñ likhtā huuñ

to aao chalen ab ghar chalte hain

din ki thakan ab sham hui hai

suraj ko apne gahware mein so jaane do

wo bahut thaka hua hai

suraj ki bimari ne hum sab ko thaka diya hai

kya jaane kal kya hoga

kal to andeshe ko kahte hain

dekho hum kitne andeshon se guzre hain aur zinda hain

us ne kaha tha zinda raho

aThaarah baras

aThaarah baras jo nind ki sansen ban kar guzar gae

aur ab jalti aankhon ki bedari wo hasil hai

jo la-hasil hai

main apni sari ninden bhul gaya hun

hum sab apne KHwabon ka sauda kar ke jina bhul chuke hain

us ne kaha tha zinda raho

jaise zinda rahna mere bas mein hai

wo sachchi thi lekin main ne us ko jhuTa samjha tha

Thahro mujh ko darwaza kholne do

ghar ki diwaron par virani hai

main aaj tumhaare sath sahar tak jagunga

donon kha kar gappen hankenge

meri mez pe

faqa-kash ummiden

wo rukhi-sukhi khati hain

jo mayusi se bach jati hain

mere bistar par be-KHwabi karwaTen leti hai

us ne kaha tha zinda raho

kya zinda rahna mere bas mein hai

main to sansen gin gin kar

apni gum-gashta ummidon ko

note-bookon main likhta hun