talluq

are paglī

tujhe mujh se mohabbat thī

to phir mujh se kahā hotā

ye kyā ki raat bhar jagnā

yūñhī bechain sī rahnā

magar sab kuchh chhupā lenā

kabhī jaanā jo sakhiyoñ meñ

munāfiq ban ke hañs lenā

kisī se yuuñ bhī kah denā

ki 'dānish' mujh pe 'āshiq hai

bahut hī chāhtā hai vo

magar maiñ kyā karūñ hamdam

ki maiñ majbūr sī laḌkī

zamāne ke rivājoñ se bañdhī mahbūs baiThī huuñ

maiñ kuchh bhī kar nahīñ saktī

agar vo mujh ko chāhe hai to phir us par ye lāzim thā

ki mujh ko jiit letā aa ke maidāñ meñ muqābil se

vo mujh ko khīñch letā shauq se pahlū-e-ā'dā se

zamāne ke rivājoñ se kabhī mujh ko churā letā

yā mere zimma-dāroñ se vo mujh ko maañg hī letā

magar vo kuchh nahīñ kahtā

ḳhafā sā mujh se rahtā hai

tumhārī ye kahānī kal bayāñ kī ek laḌkī ne

to mere dil meñ bhī ik shauq kī ātish huī paidā

maiñ is se qabl tum ko jāntā tak bhī na thā jānāñ

magar ik shauq thā ki kaun hai jo yuuñ bhī chāhe hai

ki 'āshiq ḳhud hai lekin mujh ko vo 'āshiq batā.e hai

so kuchh lamhoñ kī ḳhātir maiñ galī meñ terī dar aayā

tujhe dekhā tujhe jaanā to maiñ ne tujh ko pahchānā

ye achchhī baat hai ki sharm se tū kuchh na kah paa.ī

magar jānāñ zarā sā ik ishāra kar diyā hotā

bharam maiñ terā rakh letā

magar ye kyā ki tū ne mujh ko majnūñ naam kar Daalā

mujhe mahbūb kar ke haa.e kyoñ badnām kar Daalā

zamāna mujh se pūchhe hai ki kyoñ us se ḳhafā ho tum

batā maiñ kyā batā.ūñ dostoñ ko mas.ala kyā hai

mujhe bhī to mohabbat kā bharam rakhnā hai nā paglī

maiñ kaise kah duuñ logoñ se ki tū hī mujh pe 'āshiq hai

magar sun jab tū apnā zabt kho baiThe kabhī ro kar

to mobile uThā kar ek message mujh ko kar denā

maiñ tujh ko thaam bhī lūñgā

tujhe luTne nahīñ dūñgā

ki tū mere liye ik mohtaram mahbūb hastī hai

magar ye 'ishq kā saudā aur aise 'ishq kā saudā

maiñ hargiz kar nahīñ saktā

mujhe jab tak tirī chāhat kā kuchh ehsās ho hī nā

to maiñ kaise bhalā tujh se koī rishta rakhūñ paglī

ġhurūr-e-husn ko taj de

to phir 'dānish' bhī terā hai

ye lafz-o-lauh tere haiñ

zamāna bhī mohabbat bhī

are pagli

tujhe mujh se mohabbat thi

to phir mujh se kaha hota

ye kya ki raat bhar jagna

yunhi bechain si rahna

magar sab kuchh chhupa lena

kabhi jaana jo sakhiyon mein

munafiq ban ke hans lena

kisi se yun bhi kah dena

ki 'danish' mujh pe 'ashiq hai

bahut hi chahta hai wo

magar main kya karun hamdam

ki main majbur si laDki

zamane ke riwajon se bandhi mahbus baiThi hun

main kuchh bhi kar nahin sakti

agar wo mujh ko chahe hai to phir us par ye lazim tha

ki mujh ko jit leta aa ke maidan mein muqabil se

wo mujh ko khinch leta shauq se pahlu-e-a'da se

zamane ke riwajon se kabhi mujh ko chura leta

ya mere zimma-daron se wo mujh ko mang hi leta

magar wo kuchh nahin kahta

KHafa sa mujh se rahta hai

tumhaari ye kahani kal bayan ki ek laDki ne

to mere dil mein bhi ek shauq ki aatish hui paida

main is se qabl tum ko jaanta tak bhi na tha jaanan

magar ek shauq tha ki kaun hai jo yun bhi chahe hai

ki 'ashiq KHud hai lekin mujh ko wo 'ashiq batae hai

so kuchh lamhon ki KHatir main gali mein teri dar aaya

tujhe dekha tujhe jaana to main ne tujh ko pahchana

ye achchhi baat hai ki sharm se tu kuchh na kah pai

magar jaanan zara sa ek ishaara kar diya hota

bharam main tera rakh leta

magar ye kya ki tu ne mujh ko majnun nam kar Dala

mujhe mahbub kar ke hae kyon badnam kar Dala

zamana mujh se puchhe hai ki kyon us se KHafa ho tum

bata main kya bataun doston ko masala kya hai

mujhe bhi to mohabbat ka bharam rakhna hai na pagli

main kaise kah dun logon se ki tu hi mujh pe 'ashiq hai

magar sun jab tu apna zabt kho baiThe kabhi ro kar

to mobile uTha kar ek message mujh ko kar dena

main tujh ko tham bhi lunga

tujhe luTne nahin dunga

ki tu mere liye ek mohtaram mahbub hasti hai

magar ye 'ishq ka sauda aur aise 'ishq ka sauda

main hargiz kar nahin sakta

mujhe jab tak teri chahat ka kuchh ehsas ho hi na

to main kaise bhala tujh se koi rishta rakhun pagli

ghurur-e-husn ko taj de

to phir 'danish' bhi tera hai

ye lafz-o-lauh tere hain

zamana bhi mohabbat bhi