taaruf

tū ne to mujh ko dekhā hai

raat ke sahrā kā vairāgī

chhup ke amiltāsoñ ke piile pairāhan meñ

maiñ ne tere kamre kī pichhlī khiḌkī se tujh ko gahrī niiñd meñ hañste

karvaT lete rūThte mante dekh dekh kar akasr

apnī raat guzārī

tū ne to mujh ko dekhā hai

maiñ vo gūñgā chāñd huuñ jis se tū ne hamesha apne dil kī baat kahī hai

aaise har mauqa.a par maiñ ne ye sochā hai

tū ne mujhe pahchān liyā hai

varna tū yuuñ mujh se dil kī baat na kahtī

tū ne to mujh ko dekhā hai

maiñ hī havā kā vo jhoñkā huuñ jis ne akasr tere gesū uljhā.e haiñ

tere qarīb aane kī ḳhātir maiñ ne anekoñ ruup banā.e

maiñ bādal ban kar bhī aayā

tere shahr meñ terī galī meñ tere darvāze par ruk kar maiñ ne

tujh ko āvāzeñ diiñ

maiñ aayā huuñ

maiñ aayā huuñ

tū ye aahaT sun kar yā to kamre se āñgan meñ aa.ī

yā phir is darja sharmā.ī

āñgan se dālān meñ bhāgī

aaise har mauqa.a par maiñ ne ye sochā hai

tū ne mujhe pahchān liyā hai

varna merī aahaT to āñgan se dālān meñ āḳhir yuuñ kyuuñ jaatī

ik chappal hai paañv meñ ik āñgan meñ paḌī hai

kyā maiñ ab bhī yaad na aayā

tū ne jise ā.īna jaanā vo maiñ hī huuñ

merī hairānī meñ tū ne apne-āp ko pahroñ dekhā

merī hairānī ne tujh ko batlāyā hai

tū kaisī hai!

jab bhī merī hairānī ne tere husn kī shaan meñ koī giit sunāyā

tū ne merī hairānī ko chuum liyā hai

aaise har mauqa.a par maiñ ne ye sochā hai

tū ne mujhe pahchān liyā hai

kyā tujh ko vo sabza bilkul yaad nahīñ hai

shabnam se bhīgā vo sabza jis se tū chhup chhup kar

nañge paañv milī hai

jis ke ruḳhsāroñ par tū ne apne añgāroñ jaise ruḳhsār dhare haiñ

maiñ ne aaise har mauqa.a par ye sochā hai

tū ne mujhe pahchān liyā hai

varna tū mujh se milne yuuñ chhup kar nañge paañv na aa.ii!

kyā maiñ ab bhī yaad na aayā

tū ne to mujh ko dekhā hai

ġhairoñ se kyā pūchh rahī hai

kaun hai ye jo yuuñ tujh ko apnā kahtā hai

tu ne to mujh ko dekha hai

raat ke sahra ka wairagi

chhup ke amiltason ke pile pairahan mein

main ne tere kamre ki pichhli khiDki se tujh ko gahri nind mein hanste

karwaT lete ruThte mante dekh dekh kar akasr

apni raat guzari

tu ne to mujh ko dekha hai

main wo gunga chand hun jis se tu ne hamesha apne dil ki baat kahi hai

aaise har mauqa par main ne ye socha hai

tu ne mujhe pahchan liya hai

warna tu yun mujh se dil ki baat na kahti

tu ne to mujh ko dekha hai

main hi hawa ka wo jhonka hun jis ne akasr tere gesu uljhae hain

tere qarib aane ki KHatir main ne anekon rup banae

main baadal ban kar bhi aaya

tere shahr mein teri gali mein tere darwaze par ruk kar main ne

tujh ko aawazen din

main aaya hun

main aaya hun

tu ye aahaT sun kar ya to kamre se aangan mein aai

ya phir is darja sharmai

aangan se dalan mein bhagi

aaise har mauqa par main ne ye socha hai

tu ne mujhe pahchan liya hai

warna meri aahaT to aangan se dalan mein aaKHir yun kyun jati

ek chappal hai panw mein ek aangan mein paDi hai

kya main ab bhi yaad na aaya

tu ne jise aaina jaana wo main hi hun

meri hairani mein tu ne apne-ap ko pahron dekha

meri hairani ne tujh ko batlaya hai

tu kaisi hai!

jab bhi meri hairani ne tere husn ki shan mein koi git sunaya

tu ne meri hairani ko chum liya hai

aaise har mauqa par main ne ye socha hai

tu ne mujhe pahchan liya hai

kya tujh ko wo sabza bilkul yaad nahin hai

shabnam se bhiga wo sabza jis se tu chhup chhup kar

nange panw mili hai

jis ke ruKHsaron par tu ne apne angaron jaise ruKHsar dhare hain

main ne aaise har mauqa par ye socha hai

tu ne mujhe pahchan liya hai

warna tu mujh se milne yun chhup kar nange panw na aai!

kya main ab bhi yaad na aaya

tu ne to mujh ko dekha hai

ghairon se kya puchh rahi hai

kaun hai ye jo yun tujh ko apna kahta hai