talluq ki na-jaez tajawuzat

bahut ġhaur-o-ḳhauz ke ba.ad bil-āḳhir

talāsh ḳhatm kar dī ga.ī

is makān kī chobī sīḌhiyoñ ke

nisf dā.ere par

jo hamārī samt kā āḳhirī hissa batāyā gayā hai

aur qal.ī kar dī ga.ī

un tamām dīvār-gīr andāzoñ par

jo hameñ toḌ-maroḌ kar likhte the

alag kiye hue paañv

jo kisī ajnabī rāste kā hissa nahīñ bane

chamḌe ke jūtoñ meñ saiñt kar rakh liye ga.e

vo āñkheñ darvāzoñ se utaar kar

maḳhmalīñ kesoñ meñ

hifāzat se rakh dī ga.ī haiñ

jo kisī na.e manzar ke frame meñ puurī nahīñ aa sakīñ

in par phūñkā gayā sehr

be-ābād gharoñ ko

bataur-e-zakāt de diyā gayā

ab un gharoñ se rātoñ ko hañsne kī

jinnātī āvāzeñ aatī haiñ

vo haath bañdhe rah ga.e

namāz kī ibtidā.ī raka.atoñ meñ

aur naflī ibādateñ musalloñ ke dilkash designoñ par

uñgliyāñ phertī rah ga.iiñ

aur ham jhāḌ-phūñk kar ek ḳhāndānī ta.alluq

apne badan ke thailoñ meñ

sambhāl ke rakh chuke

is liye

tum hameñ apnī yād-dāsht kī sīḌhiyoñ se

dhakkā de kar

ḳhud ko na.e sire se rasman ta.amīr karo

bahut ghaur-o-KHauz ke baad bil-aKHir

talash KHatm kar di gai

is makan ki chobi siDhiyon ke

nisf daere par

jo hamari samt ka aaKHiri hissa bataya gaya hai

aur qali kar di gai

un tamam diwar-gir andazon par

jo hamein toD-maroD kar likhte the

alag kiye hue panw

jo kisi ajnabi raste ka hissa nahin bane

chamDe ke juton mein saint kar rakh liye gae

wo aankhen darwazon se utar kar

maKHmalin keson mein

hifazat se rakh di gai hain

jo kisi nae manzar ke frame mein puri nahin aa sakin

in par phunka gaya sehr

be-abaad gharon ko

bataur-e-zakat de diya gaya

ab un gharon se raaton ko hansne ki

jinnati aawazen aati hain

wo hath bandhe rah gae

namaz ki ibtidai rakaton mein

aur nafli ibaadaten musallon ke dilkash designon par

ungliyan pherti rah gain

aur hum jhaD-phunk kar ek KHandani talluq

apne badan ke thailon mein

sambhaal ke rakh chuke

is liye

tum hamein apni yaad-dasht ki siDhiyon se

dhakka de kar

KHud ko nae sire se rasman tamir karo