talluq toDne wale

baras bhar kī ḳhushī ke ham ne kuchh naqshe banā.e the

bhare the un meñ kaise kaise dil-kash rañg

abhī vo rañg sūkhe bhī na the bārish ne aa gherā

vo naqshe ho ga.e bad-rañg

kahāñ se yak-ba-yak barse ye patthar

ki ḳhvāboñ kī har ik khiḌkī ke shīshe chuur kar Daale

kahāñ se tezī-o-tundī bharī ye sho.alagī aa.ī

ki jis ne aarzū o shauq kī zanjīr pighlā.ī

abhī to ārzū-e-vasl ne donoñ diloñ meñ ghar basāyā thā

abhī is hijr ke Dar ne use be-daḳhl kar Daalā

abhī āzādi-e-jism-o-dil-o-jāñ kā tarāna ham ne chheḌā thā

abhī kas ne tumhāre dil pe phir phūñkā vahī mantar

ki tum insāñ nahīñ ho ik samājī jānvar ho tum

tumheñ rasmoñ kā qānūnoñ kā bhārī bojh Dhonā hai

numā.ish ke kasī rishte kī ḳhātir hañsnā ronā hai

na insāñ ho na haivāñ ho samājī jānvar ho tum

samājī jānvar ho tum

baras bhar ki KHushi ke hum ne kuchh naqshe banae the

bhare the un mein kaise kaise dil-kash rang

abhi wo rang sukhe bhi na the barish ne aa ghera

wo naqshe ho gae bad-rang

kahan se yak-ba-yak barse ye patthar

ki KHwabon ki har ek khiDki ke shishe chur kar Dale

kahan se tezi-o-tundi bhari ye shoalagi aai

ki jis ne aarzu o shauq ki zanjir pighlai

abhi to aarzu-e-wasl ne donon dilon mein ghar basaya tha

abhi is hijr ke Dar ne use be-daKHl kar Dala

abhi aazadi-e-jism-o-dil-o-jaan ka tarana hum ne chheDa tha

abhi kas ne tumhaare dil pe phir phunka wahi mantar

ki tum insan nahin ho ek samaji jaanwar ho tum

tumhein rasmon ka qanunon ka bhaari bojh Dhona hai

numaish ke kasi rishte ki KHatir hansna rona hai

na insan ho na haiwan ho samaji jaanwar ho tum

samaji jaanwar ho tum