tariKH ek KHamosh zamana

ye saaTh sadī kā qissa hai

ye saaTh baras kī baat nahīñ

tārīḳh ne jab āñkheñ kholīñ

sab paanī thā

phir paanī par tasvīr banī

tasvīr zamīñ par phail ga.ī

aur us par bārish TuuT paḌī

ik biij kahīñ par

saaTh sadī kī aahaT se bedār huā

jañgal ban kar phail gayā

vahīñ kahīñ par maiñ bhī thā

tum bhī thiiñ

tārīḳh ne dastak dī thī

tārīḳh utrī thī dhartī par

vo raat thī pūran-māshī kī

phir dhartī hī tārīḳh banī

tārīḳh koī bandar to nahīñ

tārīḳh koī chehra to nahīñ

tārīḳh to ek samundar hai

jo pūran-māshī kī rātoñ meñ

pāgal ho kar phailtā hai

aur sab ko bahā le jaatā hai

tārīḳh koī ḳhāmosh zamāna hotā hai

jo sadiyoñ tak mausam kī god meñ sotā hai

phir karvaT le kar jāgtā hai

aisā mujh ko

'gautam-budh' ne gyaan samay samjhāyā thā

aur ye to mujh se āḳhirī aadmī ne pūchā thā

are miyāñ kis khūñT chale ho

Thahro

ye saaTh sadī kā qissa hai

kuchh aur nahīñ hai

aur mere andar to un sadiyoñ kī vo guuñj basī hai

jo aglī kitnī sadiyoñ tak

pūran-māshī kī rātoñ meñ

āvāz banegī

ye saaTh sadī kā qissa hai

kuchh aur nahīñ hai

mere andar saaTh sadī kī guuñj basī hai

maiñ aur tum is guuñj meñ gyaan kināre

aa kar baiTh ga.e the

tārīḳh ne jab is dhartī par bisrām kiyā

jab qissa-go kī lorī meñ ham sote the

aur chiḌiyoñ kī chahkār meñ āñkheñ kholte the

mausam ke mizāj meñ rachī huī bātoñ meñ

amrit gholte the

yahīñ kahīñ par ham tum

'mīr' aur 'mīrā' ke dukh dil meñ album karte the

vo dukh tandūr kī roTī meñ pak jaate the

merī aur tumhārī maañ

vo roTī apne dil ke tandūr se laatī thī

phir bhuuk hamārī pahle se baḌh jaatī thī

maiñ aur tum tārīḳh ke biij se phūTeñge

aur 'gautam-budh' ke jañgal jaisī umr meñ Dhal jā.eñge

ye saTh sadi ka qissa hai

ye saTh baras ki baat nahin

tariKH ne jab aankhen kholin

sab pani tha

phir pani par taswir bani

taswir zamin par phail gai

aur us par barish TuT paDi

ek bij kahin par

saTh sadi ki aahaT se bedar hua

jangal ban kar phail gaya

wahin kahin par main bhi tha

tum bhi thin

tariKH ne dastak di thi

tariKH utri thi dharti par

wo raat thi puran-mashi ki

phir dharti hi tariKH bani

tariKH koi bandar to nahin

tariKH koi chehra to nahin

tariKH to ek samundar hai

jo puran-mashi ki raaton mein

pagal ho kar phailta hai

aur sab ko baha le jata hai

tariKH koi KHamosh zamana hota hai

jo sadiyon tak mausam ki god mein sota hai

phir karwaT le kar jagta hai

aisa mujh ko

'gautam-budh' ne gyan samay samjhaya tha

aur ye to mujh se aaKHiri aadmi ne pucha tha

are miyan kis khunT chale ho

Thahro

ye saTh sadi ka qissa hai

kuchh aur nahin hai

aur mere andar to un sadiyon ki wo gunj basi hai

jo agli kitni sadiyon tak

puran-mashi ki raaton mein

aawaz banegi

ye saTh sadi ka qissa hai

kuchh aur nahin hai

mere andar saTh sadi ki gunj basi hai

main aur tum is gunj mein gyan kinare

aa kar baiTh gae the

tariKH ne jab is dharti par bisram kiya

jab qissa-go ki lori mein hum sote the

aur chiDiyon ki chahkar mein aankhen kholte the

mausam ke mizaj mein rachi hui baaton mein

amrit gholte the

yahin kahin par hum tum

'mir' aur 'mira' ke dukh dil mein album karte the

wo dukh tandur ki roTi mein pak jate the

meri aur tumhaari man

wo roTi apne dil ke tandur se lati thi

phir bhuk hamari pahle se baDh jati thi

main aur tum tariKH ke bij se phuTenge

aur 'gautam-budh' ke jangal jaisi umr mein Dhal jaenge