tashqand ki sham

manāo jashn-e-mohabbat ki ḳhuuñ kī bū na rahī

baras ke khul ga.e bārūd ke siyah bādal

bujhī bujhī sī hai jañgoñ kī āḳhirī bijlī

mahak rahī hai gulāboñ se tāshqand kī shaam

jagāo gesū-e-jānāñ kī ambarīñ rāteñ

jalāo sā.ad-e-sīmīñ kī sham-e-kafūrī

tavīl bosoñ ke gul-rañg jaam chhalkāo

ye surḳh jaam hai ḳhūbān-e-tāshqand ke naam

ye sabz jaam hai lahore ke hasīnoñ kā

safed jaam hai dillī ke dilbaroñ ke liye

ghulā hai jis meñ mohabbat ke āftāb kā rañg

khulī huī hai ufuq par shafaq tabassum kī

nasīm-e-shauq chalī mehrbāñ takallum kī

laboñ kī sho.ala-fishānī hai shabnam-afshānī

isī meñ sub.h-e-tamannā nahā ke nikhregī

kisī kī zulf na ab shām-e-ġham meñ bikhregī

javān ḳhauf kī vaadī se ab na guzreñge

jiyāle maut ke sāhil pe ab na utreñge

bharī na jā.egī ab ḳhāk-o-ḳhūñ se maañg kabhī

milegī maañ ko na marg-e-pisar kī ḳhush-ḳhabarī

koī na degā yatīmoñ ko ab mubārakbād

khileñge phuul bahut sarhad-e-tamannā par

ḳhabar na hogī ye nargis hai kis kī ā.ankhoñ kī

ye gul hai kis kī jabīñ kis kā lab hai ye laala

ye shāḳh kis ke javāñ bāzuoñ kī añgḌā.ī

bas itnā hogā ye dhartī hai shahsavāroñ kī

jahān-e-husn ke gumnām tājdāroñ kī

ye sarzamīñ hai mohabbat ke ḳhvāstgāroñ kī

jo gul pe marte the shabnam se pyaar karte the

ḳhudā kare ki ye shabnam yuuñ hī barastī rahe

zamīñ hamesha lahū ke liye tarastī rahe

manao jashn-e-mohabbat ki KHun ki bu na rahi

baras ke khul gae barud ke siyah baadal

bujhi bujhi si hai jangon ki aaKHiri bijli

mahak rahi hai gulabon se tashqand ki sham

jagao gesu-e-jaanan ki ambarin raaten

jalao saad-e-simin ki sham-e-kafuri

tawil boson ke gul-rang jam chhalkao

ye surKH jam hai KHuban-e-tashqand ke nam

ye sabz jam hai lahore ke hasinon ka

safed jam hai dilli ke dilbaron ke liye

ghula hai jis mein mohabbat ke aaftab ka rang

khuli hui hai ufuq par shafaq tabassum ki

nasim-e-shauq chali mehrban takallum ki

labon ki shoala-fishani hai shabnam-afshani

isi mein subh-e-tamanna naha ke nikhregi

kisi ki zulf na ab sham-e-gham mein bikhregi

jawan KHauf ki wadi se ab na guzrenge

jiyale maut ke sahil pe ab na utrenge

bhari na jaegi ab KHak-o-KHun se mang kabhi

milegi man ko na marg-e-pisar ki KHush-KHabari

koi na dega yatimon ko ab mubarakbaad

khilenge phul bahut sarhad-e-tamanna par

KHabar na hogi ye nargis hai kis ki aaankhon ki

ye gul hai kis ki jabin kis ka lab hai ye lala

ye shaKH kis ke jawan bazuon ki angDai

bas itna hoga ye dharti hai shahsawaron ki

jahan-e-husn ke gumnam tajdaron ki

ye sarzamin hai mohabbat ke KHwastgaron ki

jo gul pe marte the shabnam se pyar karte the

KHuda kare ki ye shabnam yun hi barasti rahe

zamin hamesha lahu ke liye tarasti rahe