tatilat

baḌoñ ko aur chhoToñ ko inhīñ sadmāt ne maarā

mujhe daftar unheñ college kī ta.atīlāt ne maarā

kabhī sardī kī chhuTTī hai kabhī garmī kī chhuTTī hai

ye sab us ke alāva haiñ jo haT-dharmī kī chhuTTī hai

kabhī ta.atīl khāne kī kabhī ta.atīl piine kī

paḌhā.ī do mahīne chhuTTiyāñ haiñ das mahīne kī

abhī parsoñ to hai rañgīnī-e-hālāt kī chhuTTī

phir us ke ba.ad puure maah hai barsāt kī chhuTTī

kabhī schōl meñ ustād ke sar-dard kī chhuTTī

havā-e-sard chal jaa.e to phir har fard kī chhuTTī

kabhī afsar ko thoḌā sā buḳhār aa jaa.e to chhuTTī

kabhī sasurāl se begam kā taar aa jaa.e to chhuTTī

kabhī Table pe rakh ke paañv so jaanā bhī chhuTTī hai

kabhī daftar se uTh kar gol ho jaanā bhī chhuTTī hai

abhī to dard ke āsār kuchh baaqī haiñ siine meñ

abhī to biis hī nāġhe hue haiñ is mahīne meñ

ġharaz jo tīn-sau-paiñsaTh dinoñ ke goshvāre haiñ

hamāre tīn-sau din haiñ faqat paiñsaTh tumhāre haiñ

baDon ko aur chhoTon ko inhin sadmat ne mara

mujhe daftar unhen college ki tatilat ne mara

kabhi sardi ki chhuTTi hai kabhi garmi ki chhuTTi hai

ye sab us ke alawa hain jo haT-dharmi ki chhuTTi hai

kabhi tatil khane ki kabhi tatil pine ki

paDhai do mahine chhuTTiyan hain das mahine ki

abhi parson to hai rangini-e-haalat ki chhuTTi

phir us ke baad pure mah hai barsat ki chhuTTi

kabhi school mein ustad ke sar-dard ki chhuTTi

hawa-e-sard chal jae to phir har fard ki chhuTTi

kabhi afsar ko thoDa sa buKHar aa jae to chhuTTi

kabhi sasural se begam ka tar aa jae to chhuTTi

kabhi Table pe rakh ke panw so jaana bhi chhuTTi hai

kabhi daftar se uTh kar gol ho jaana bhi chhuTTi hai

abhi to dard ke aasar kuchh baqi hain sine mein

abhi to bis hi naghe hue hain is mahine mein

gharaz jo tin-sau-painsaTh dinon ke goshware hain

hamare tin-sau din hain faqat painsaTh tumhaare hain