tagore

sahar ke vaqt jab ThanDī havā.eñ sarsarātī haiñ

chaman kā rañg khil jaatā hai kaliyāñ muskurātī haiñ

parinde tolte haiñ par nikal kar āshiyāne se

fazā.eñ guuñj uThtī haiñ anādil ke tarāne se

taḳhayyul aadmī kā jab na.ī tashkīl paatā hai

nizām-e-bazm-e-ālam meñ taġhayyur hotā jaatā hai

hazāroñ mard-e-maidāñ ḳhuun paanī ek karte haiñ

rah-e-mushkil-talab se tab kahīñ āsāñ guzarte haiñ

koī bīmār kā jab pūchhne vaalā nahīñ hotā

maraz baḌhtā hī jaatā hai magar achchhā nahīñ hotā

mujhe tagore kā guzrā zamāna yaad aatā hai

Tapak paḌte haiñ aañsū vo fasāna yaad aatā hai

payām-e-zindagī le kar jo aayā thā zamāne meñ

qayāmat hai usī ko maut ne chhāñTā zamāne meñ

sahar ke waqt jab ThanDi hawaen sarsaraati hain

chaman ka rang khil jata hai kaliyan muskuraati hain

parinde tolte hain par nikal kar aashiyane se

fazaen gunj uThti hain anadil ke tarane se

taKHayyul aadmi ka jab nai tashkil pata hai

nizam-e-bazm-e-alam mein taghayyur hota jata hai

hazaron mard-e-maidan KHun pani ek karte hain

rah-e-mushkil-talab se tab kahin aasan guzarte hain

koi bimar ka jab puchhne wala nahin hota

maraz baDhta hi jata hai magar achchha nahin hota

mujhe tagore ka guzra zamana yaad aata hai

Tapak paDte hain aansu wo fasana yaad aata hai

payam-e-zindagi le kar jo aaya tha zamane mein

qayamat hai usi ko maut ne chhanTa zamane mein