tajdid

koī aaya hai tabassum kī ziyā phail ga.ī

ruuh vīrān thī hañsne kā zamāna aaya

ab isī zaḳhm ke bharne kā zamāna aaya

koī aaya hai nadāmat kā fusūñ āñkhoñ meñ

sub.h ke nuur kī mānind chamak uThtā hai

merī duniyā-e-mohabbat kā ḳhudā aaya hai

aaj ruk jā.eñge bahte hue aañsū mere

aaj phir nuur kī qindīl jalegī ghar meñ

zindagī aaj simaT aa.ī hai kāshāne meñ

aaj phir mujh ko gunahgār banā jā.egī

ziist ko ziist kā shahkār banā jā.egī

chheḌ kar sāz-e-masarrat koī ḳhāmoshī se

ab utartā hai mirī ruuh kī gahrā.ī meñ

āb-e-kausar meñ koī mauj uThī thī lekin

tham ga.ī hai mire paimāne meñ aakar jaise

is tarah parde uThā.e ga.e chupke chupke

kārobār-e-dil-e-nādāñ pe koī hañs na sakā

jaise ab koī haqīqat hī nahīñ is ke sivā

merī duniyā-e-mohabbat kā ḳhudā aa hī gayā

koi aaya hai tabassum ki ziya phail gai

ruh viran thi hansne ka zamana aaya

ab isi zaKHm ke bharne ka zamana aaya

koi aaya hai nadamat ka fusun aankhon mein

subh ke nur ki manind chamak uThta hai

meri duniya-e-mohabbat ka KHuda aaya hai

aaj ruk jaenge bahte hue aansu mere

aaj phir nur ki qindil jalegi ghar mein

zindagi aaj simaT aai hai kashane mein

aaj phir mujh ko gunahgar bana jaegi

zist ko zist ka shahkar bana jaegi

chheD kar saz-e-masarrat koi KHamoshi se

ab utarta hai meri ruh ki gahrai mein

aab-e-kausar mein koi mauj uThi thi lekin

tham gai hai mere paimane mein aakar jaise

is tarah parde uThae gae chupke chupke

karobar-e-dil-e-nadan pe koi hans na saka

jaise ab koi haqiqat hi nahin is ke siwa

meri duniya-e-mohabbat ka KHuda aa hi gaya