tajrid

zindagī maiñ tire darvāze par

ik bhikārī kī tarah aayā thā

apne dāman ko banā kar kashkol

terī har raah pe phailāyā thā

ek marhūm kiran kī ḳhātir

mujh ko thoḌī sī ziyā bhī na milī

dam-ba-dam Dūbte sayyāre ko

apne markaz se sadā bhī na milī

daf.atan ek dhamāke ke saath

kachche dhāgoñ ke sire chhūT ga.e

uñgliyāñ chhil ga.iiñ armānoñ kī

yak-ba-yak tār-e-nafas TuuT ga.e

aur phir ek ghanā sannāTā

aur phir rasm-e-kohan ke gesū

kuchh dilāse kī zabānī bāteñ

kuchh dikhāve ke purāne aañsū

2

kohr meñ Duub ga.ī thiiñ sham.eñ

vaqt nārāz thā qismat kī tarah

raat ke ruḳh pe the zaḳhmoñ ke nishān

merī majrūh hamīyat kī tarah

ik ḳhatarnāk kagāre ke qarīb

tujh se laḌne kā irāda le kar

maiñ ne mohroñ ko sikhā.ī shorish

maiñ ne maujoñ ke bigāḌe tevar

tū magar aa.ī to ik lamhe meñ

na vo tevar the na vo aaheñ thiiñ

tere aariz pe mire aañsū the

merī gardan meñ tirī bāheñ thiiñ

zindagi main tere darwaze par

ek bhikari ki tarah aaya tha

apne daman ko bana kar kashkol

teri har rah pe phailaya tha

ek marhum kiran ki KHatir

mujh ko thoDi si ziya bhi na mili

dam-ba-dam Dubte sayyare ko

apne markaz se sada bhi na mili

dafatan ek dhamake ke sath

kachche dhagon ke sire chhuT gae

ungliyan chhil gain armanon ki

yak-ba-yak tar-e-nafas TuT gae

aur phir ek ghana sannaTa

aur phir rasm-e-kohan ke gesu

kuchh dilase ki zabani baaten

kuchh dikhawe ke purane aansu

2

kohr mein Dub gai thin shamen

waqt naraaz tha qismat ki tarah

raat ke ruKH pe the zaKHmon ke nishan

meri majruh hamiyat ki tarah

ek KHatarnak kagare ke qarib

tujh se laDne ka irada le kar

main ne mohron ko sikhai shorish

main ne maujon ke bigaDe tewar

tu magar aai to ek lamhe mein

na wo tewar the na wo aahen thin

tere aariz pe mere aansu the

meri gardan mein teri bahen thin