tajziya

dosto aaj be-samt chalte haiñ log

tum bhī is bhiiḌ meñ kho ke rah jāoge

aao maazī kī kholeñ kitāb-e-amal

ik nazar sarsarī hī sahī Daal kar

dekh leñ apne sab kārnāmoñ kā hashr

tajziya apnī nākāmiyoñ kā kareñ

apnī mahrūmiyoñ par hañseñ ḳhuub jī kho kar

aur socheñ ki kyuuñ

shahr ke shor meñ gum karāhoñ kā nauha huā

ham pe kyuuñ be-dilī chhā ga.ī

reñgtī zindagī kī baqā ke liye

ham ne kyuuñ uḌte lamhoñ ke par kaaT kar rakh diye

ik jibillat kī taskīn ke vāste

kar ke samjhautā apne hī dushman ke saath

valvale bech Daale harīfoñ ke haath

dosto aaj be-samt chalte hain log

tum bhi is bhiD mein kho ke rah jaoge

aao mazi ki kholen kitab-e-amal

ek nazar sarsari hi sahi Dal kar

dekh len apne sab karnamon ka hashr

tajziya apni nakaamiyon ka karen

apni mahrumiyon par hansen KHub ji kho kar

aur sochen ki kyun

shahr ke shor mein gum karahon ka nauha hua

hum pe kyun be-dili chha gai

rengti zindagi ki baqa ke liye

hum ne kyun uDte lamhon ke par kaT kar rakh diye

ek jibillat ki taskin ke waste

kar ke samjhauta apne hi dushman ke sath

walwale bech Dale harifon ke hath