taKHliq sher

bahut dinoñ se udaas nazroñ kī rahguzar thī

paḌī thiiñ suunī ufuq kī rāheñ

ki dil kī mahfil meñ

naġhma o naala o navā kī

ajab sī shorish nahīñ huī thī

nazar uThā.ī to duur dhundlī fazāoñ meñ

raushnī kā ik dā.era sā dekhā

laraz ke Thahrā jo dil

taḳhayyul ne apne shahpar fazā meñ khole

ki jaise

parvāz kā sahīfa khule

to niile gagan ke asrār jaag uTTheñ

ki jaise

maah o nujūm kī mamlikat kā rasta koī batā de

fazā se parde koī uThā de

ki jaise

ik be-kanār sahrā meñ

mauj-e-reg-e-ravāñ nuqūsh-e-navī banā de

ki jaise tā.er-e-havā kī lahroñ pe, jumbish-e-par se

dāstān-e-vajūd likh deñ

ki jaise

tārīk shab ke dāman meñ

Dast-e-qudrat, charāġh-e-dil yak-ba-yak jalā de

bahut dinon se udas nazron ki rahguzar thi

paDi thin suni ufuq ki rahen

ki dil ki mahfil mein

naghma o nala o nawa ki

ajab si shorish nahin hui thi

nazar uThai to dur dhundli fazaon mein

raushni ka ek daera sa dekha

laraz ke Thahra jo dil

taKHayyul ne apne shahpar faza mein khole

ki jaise

parwaz ka sahifa khule

to nile gagan ke asrar jag uTThen

ki jaise

mah o nujum ki mamlikat ka rasta koi bata de

faza se parde koi uTha de

ki jaise

ek be-kanar sahra mein

mauj-e-reg-e-rawan nuqush-e-nawi bana de

ki jaise taer-e-hawa ki lahron pe, jumbish-e-par se

dastan-e-wajud likh den

ki jaise

tarik shab ke daman mein

Dast-e-qudrat, charagh-e-dil yak-ba-yak jala de