talash-e-jahan-e-napaid

jahāñ na sāya-e-māzī kahīñ nazar aa.e

jahāñ na fikr ho fardā kī koī dāman-gīr

na dost ho na shanāsā na koī dushman ho

kisī kī ambarī-zulfoñ kā maiñ nahīñ huuñ asiir

safar jo ho to koī kārvāñ na rahbar ho

na manziloñ ke liye ho talāsh dāman-gīr

ho dasht merā makāñ aur koh dīvāreñ

ho sā.ebāñ kī tarah sar pe āsmān-e-dabīr

na yuuñ hayāt ho fikr-e-ma.āsh se bezār

ki jaise paañv meñ hotī hai qaid kī zanjīr

na bad-zanī kī ho kulfat na Dar sazā kā ho

na iltijā-e-karam se karūñ maiñ ḳhud ko haqīr

agar maiñ siikh luuñ qudrat se zindagī kā chalan

ye barg phuul havā bas yahī hoñ mere mushīr

kabhī jo niiñd na aa.e darāz rātoñ meñ

falak ke raaz sunā.eñ mujhe falak ke safīr

na ḳhvāb aa.eñ mirī niiñd itnī gahrī ho

sahar ko hājat-e-tafsīr-e-ḳhvāb ho na 'amīr'

jahan na saya-e-mazi kahin nazar aae

jahan na fikr ho farda ki koi daman-gir

na dost ho na shanasa na koi dushman ho

kisi ki ambari-zulfon ka main nahin hun asir

safar jo ho to koi karwan na rahbar ho

na manzilon ke liye ho talash daman-gir

ho dasht mera makan aur koh diwaren

ho saeban ki tarah sar pe aasman-e-dabir

na yun hayat ho fikr-e-maash se bezar

ki jaise panw mein hoti hai qaid ki zanjir

na bad-zani ki ho kulfat na Dar saza ka ho

na iltija-e-karam se karun main KHud ko haqir

agar main sikh lun qudrat se zindagi ka chalan

ye barg phul hawa bas yahi hon mere mushir

kabhi jo nind na aae daraaz raaton mein

falak ke raaz sunaen mujhe falak ke safir

na KHwab aaen meri nind itni gahri ho

sahar ko hajat-e-tafsir-e-KHwab ho na 'amir'