talash-e-jannat

aao ab apnī gum-shuda jannat kareñ talāsh

phir vā'da-e-chinār kī 'azmat kareñ talāsh

nafrat ke saare naqsh miTā kar diloñ se ham

aao ḳhulūs aur mohabbat kareñ talāsh

sargoshiyāñ sunā.ī deñ pattoñ kī jis jagah

phir vo sukūn phir vahī ḳhalvat kareñ talāsh

sharmā uTheñ jo dekh ke hūreñ bahisht kī

har nāznīñ ke ruḳh pe vo rangat kareñ talāsh

gulshan kī aao sair kareñ bhauñrā ban ke ham

phal meñ miThās phuul meñ nik.hat kareñ talāsh

Dal jhiil meñ ho pahle sī phir se chahal-pahal

phir chashm-e-shāhī kī chalo barakat kareñ talāsh

jang-o-jadal kī bhuul ke saarī hikāyateñ

santoñ kī sūfiyoñ kī rivāyat kareñ talāsh

ik nuur se haiñ paidā hue shaiḳh-o-barhaman

har shai meñ aao jalva-e-vahdat kareñ talāsh

tauba kareñ gunāh se dahshat se dosto

us rahmat-e-tamām kī rahmat kareñ talāsh

aao ab apni gum-shuda jannat karen talash

phir wa'da-e-chinar ki 'azmat karen talash

nafrat ke sare naqsh miTa kar dilon se hum

aao KHulus aur mohabbat karen talash

sargoshiyan sunai den patton ki jis jagah

phir wo sukun phir wahi KHalwat karen talash

sharma uThen jo dekh ke huren bahisht ki

har naznin ke ruKH pe wo rangat karen talash

gulshan ki aao sair karen bhaunra ban ke hum

phal mein miThas phul mein nikhat karen talash

Dal jhil mein ho pahle si phir se chahal-pahal

phir chashm-e-shahi ki chalo barakat karen talash

jang-o-jadal ki bhul ke sari hikayaten

santon ki sufiyon ki riwayat karen talash

ek nur se hain paida hue shaiKH-o-barhaman

har shai mein aao jalwa-e-wahdat karen talash

tauba karen gunah se dahshat se dosto

us rahmat-e-tamam ki rahmat karen talash