talatum

dil aaj bahut ghabrātā hai

dil aaj bahut ghabrātā hai

tūfān-o-talātum ke paale girdāb sambhāle haiñ mujh ko

ik rāhat-e-jāñ hamdam kī tarah kuchh ḳhvāb sambhāle haiñ mujh ko

yuuñ mere ġhamoñ ke sanjīda ādāb sambhāle haiñ mujh ko

aur merī tabāhī par ḳhandāñ ahbāb sambhāle haiñ mujh ko

har zaḳhm-e-jigar samjhātā hai

dil aaj bahut ghabrātā hai

ghabrā ke ġhurūr-e-fāqa-kashī pahlū meñ biThā letā hai mujhe

sharmā ke surūr-e-tishna-labī dāman meñ chhupā letā hai mujhe

samjhā ke fareb-e-nauhagarī bātoñ meñ lagā letā hai mujhe

bahlā ke sukūt-e-nīm-shabī zaanū pe sulā letā hai mujhe

har shai se magar uktātā hai

dil aaj bahut ghabrātā hai

kyā aaj mirī ḳhāmoshī bhī ik shor-e-fuġhāñ ban jā.egī

jhuñjhlā ke nigāh-e-yās mirī ḳhud shoa.la-fishāñ ban jā.egī

pahlū se bagūle uTTheñge har saañs dhuāñ ban jā.egī

jaise ki mirī nākāmī bhī ik azm-e-javāñ ban jā.egī

sho.ale kī tarah lahrātā hai

dil aaj bahut ghabrātā hai

ḳhirman kī hamiyyat jaagī hai ai barq-o-sharār ab kyā hogā

barham hai nizām-e-hastī bhī ai dard-e-jigar ab kyā hogā

har va.ada-e-fardā ruuTh gayā ai shām-o-sahar ab kyā hogā

chauñkā hai zamīr-e-vahm-o-gumāñ ai zauq-e-nazar ab kyā hogā

kyā jāniye kyā samjhātā hai

dil aaj bahut ghabrātā hai

kyā aaj maiñ apne so.e hue jazbāt-e-junūñ bedār karūñ

sailāb-e-havādis ban jā.ūñ barbādī-e-sad-āzād karūñ

niklūñ maiñ hudūd-e-imkāñ se tūfāñ se nigāheñ chaar karūñ

ik talḳh tabassum ko le kar duniyā-e-sitam par vaar karūñ

dil aaj bahut ghabraata hai

dil aaj bahut ghabraata hai

tufan-o-talatum ke pale girdab sambhaale hain mujh ko

ek rahat-e-jaan hamdam ki tarah kuchh KHwab sambhaale hain mujh ko

yun mere ghamon ke sanjida aadab sambhaale hain mujh ko

aur meri tabahi par KHandan ahbab sambhaale hain mujh ko

har zaKHm-e-jigar samjhata hai

dil aaj bahut ghabraata hai

ghabra ke ghurur-e-faqa-kashi pahlu mein biTha leta hai mujhe

sharma ke surur-e-tishna-labi daman mein chhupa leta hai mujhe

samjha ke fareb-e-nauhagari baaton mein laga leta hai mujhe

bahla ke sukut-e-nim-shabi zanu pe sula leta hai mujhe

har shai se magar uktata hai

dil aaj bahut ghabraata hai

kya aaj meri KHamoshi bhi ek shor-e-fughan ban jaegi

jhunjhla ke nigah-e-yas meri KHud shoala-fishan ban jaegi

pahlu se bagule uTThenge har sans dhuan ban jaegi

jaise ki meri nakaami bhi ek azm-e-jawan ban jaegi

shoale ki tarah lahraata hai

dil aaj bahut ghabraata hai

KHirman ki hamiyyat jagi hai ai barq-o-sharar ab kya hoga

barham hai nizam-e-hasti bhi ai dard-e-jigar ab kya hoga

har wada-e-farda ruTh gaya ai sham-o-sahar ab kya hoga

chaunka hai zamir-e-wahm-o-guman ai zauq-e-nazar ab kya hoga

kya jaaniye kya samjhata hai

dil aaj bahut ghabraata hai

kya aaj main apne soe hue jazbaat-e-junun bedar karun

sailab-e-hawadis ban jaun barbaadi-e-sad-azad karun

niklun main hudud-e-imkan se tufan se nigahen chaar karun

ek talKH tabassum ko le kar duniya-e-sitam par war karun