talab ke tale

gul-o-yāsman kal se nā-āshnā

kal se be-e'tinā

gul-o-yāsman apne jismoñ kī hai.at meñ fard

magar kal se nā-āshnā kal se be-e'tinā

kasī marg-e-mubram kā dard

un ke dil meñ nahīñ!

faqat apnī tārīḳh kī be-sar-o-pā talab ke tale

ham dabe haiñ!

ham apne vajūdoñ kī pinhāñ taheñ

kholte tak nahīñ

aarzū bolte tak nahīñ!

ye tārīḳh merī nahīñ aur terī nahīñ

ye tārīḳh hai izhdihām-e-ravāñ

usī izhdihām-e-ravāñ kī ye tārīḳh hai

ye vo chīḳh hai

jis kī takrār apne man-o-tū meñ hai

vo takrār jo apnī tahzīb kī hū meñ hai

tujhe is pe hairat nahīñ

ham is izhdihām-e-ravāñ ke nishān-e-qadam par chale jā rahe haiñ

baḌhe jā rahe haiñ

ki ham zulmat-e-shab meñ tanhā

paḌe rah na jaa.eñ

baḌhe jā rahe haiñ

na jiine kī ḳhātir

na is se fuzūñ zinda rahne kī ḳhātir

baḌhe jā rahe haiñ kisī aib se

rahzan-e-marg se bach nikalne kī ḳhātir

judā.ī kī ḳhātir!

kisī fard ke ḳhauf se baḌh rahe haiñ

jo bātin ke TuuTe darīchoñ ke pīchhe

sharārat se hañstā chalā jā rahā hai

gul-o-yasman kal se na-ashna

kal se be-e'tina

gul-o-yasman apne jismon ki haiat mein fard

magar kal se na-ashna kal se be-e'tina

kasi marg-e-mubram ka dard

un ke dil mein nahin!

faqat apni tariKH ki be-sar-o-pa talab ke tale

hum dabe hain!

hum apne wajudon ki pinhan tahen

kholte tak nahin

aarzu bolte tak nahin!

ye tariKH meri nahin aur teri nahin

ye tariKH hai izhdiham-e-rawan

usi izhdiham-e-rawan ki ye tariKH hai

ye wo chiKH hai

jis ki takrar apne man-o-tu mein hai

wo takrar jo apni tahzib ki hu mein hai

tujhe is pe hairat nahin

hum is izhdiham-e-rawan ke nishan-e-qadam par chale ja rahe hain

baDhe ja rahe hain

ki hum zulmat-e-shab mein tanha

paDe rah na jaen

baDhe ja rahe hain

na jine ki KHatir

na is se fuzun zinda rahne ki KHatir

baDhe ja rahe hain kisi aib se

rahzan-e-marg se bach nikalne ki KHatir

judai ki KHatir!

kisi fard ke KHauf se baDh rahe hain

jo baatin ke TuTe darichon ke pichhe

shararat se hansta chala ja raha hai