talabgar mard tha

raat kī zulf-e-siyah aur sañvartī hī rahī

raat kī zulf-e-siyah aur sañvartī hī rahī

chāñd kī bikhrī huī sard shuāoñ se alag

aur khamboñ kī sulagtī huī āñkhoñ se alag

ik nazar thī jo ḳhalāoñ meñ bhaTaktī hī rahī

silvaTeñ soch kī gahrī huiiñ gahrī ho kar

mere māhaul pe chhā.ī ga.iiñ chhātī hī ga.iiñ

merī be-tāb nazar charḳh se Takrā hī ga.ī

aur Takrā.ī to phir charḳh kī ra.anā.ī ga.ī

gardisheñ chāñd sitāroñ kī nazar aane lagīñ

gardisheñ tez huīñ, tez huīñ, tez huiiñ

aur phir tez, bahut tez, bahut tez huiiñ

jaise ye gardisheñ karte hue tāre, ye chāñd

kurra-e-arz se yak-bārgī Takrā.eñge

aur phir gardisheñ kartā huā har ik taarā

az-sar-e-nau kura-e-arz banā hī legā

aur phir gardisheñ kartā huā ye zard sā chāñd

ik ufuq apne liye aur sajā hī legā

kurra-e-arz jahāñ maut na kāhish hogī

ik ufuq, jis meñ tapish aur na sozish hogī

tez-tar hotī ga.iiñ gardisheñ sayyāroñ kī

nāchtā hī rahā mehvar pe vo piilā mahtāb

aur har samt isī gardish-e-paiham kā ḳharosh

aur phir rah na gayā raqs ke andāz meñ josh

ek parvāna girā sham-e-fasurda ke qarīb

ek taare ne kahā TuuT ke, lo maiñ to chalā

aur phir gardisheñ kartā huā

aur phir maiñ thā vahī martā sulagtā māhaul

raqs karte hue sayyāroñ kī sa.i-e-nākām

raat kī zulf-e-siyah aur sañvartī hī rahī

raat ki zulf-e-siyah aur sanwarti hi rahi

raat ki zulf-e-siyah aur sanwarti hi rahi

chand ki bikhri hui sard shuaon se alag

aur khambon ki sulagti hui aankhon se alag

ek nazar thi jo KHalaon mein bhaTakti hi rahi

silwaTen soch ki gahri huin gahri ho kar

mere mahaul pe chhai gain chhati hi gain

meri be-tab nazar charKH se Takra hi gai

aur Takrai to phir charKH ki ranai gai

gardishen chand sitaron ki nazar aane lagin

gardishen tez huin, tez huin, tez huin

aur phir tez, bahut tez, bahut tez huin

jaise ye gardishen karte hue tare, ye chand

kurra-e-arz se yak-bargi Takraenge

aur phir gardishen karta hua har ek tara

az-sar-e-nau kura-e-arz bana hi lega

aur phir gardishen karta hua ye zard sa chand

ek ufuq apne liye aur saja hi lega

kurra-e-arz jahan maut na kahish hogi

ek ufuq, jis mein tapish aur na sozish hogi

tez-tar hoti gain gardishen sayyaron ki

nachta hi raha mehwar pe wo pila mahtab

aur har samt isi gardish-e-paiham ka KHarosh

aur phir rah na gaya raqs ke andaz mein josh

ek parwana gira sham-e-fasurda ke qarib

ek tare ne kaha TuT ke, lo main to chala

aur phir gardishen karta hua

aur phir main tha wahi marta sulagta mahaul

raqs karte hue sayyaron ki sai-e-nakaam

raat ki zulf-e-siyah aur sanwarti hi rahi