tamasha-gah-e-lala-zar

tamāshā-gah-e-lāla-zār

''tiyātar'' pe merī nigāheñ jamī thiiñ

mire kaan ''music'' ke zer-o-bam par lage the

magar merā dil phir bhī kartā rahā thā

arab aur ajam ke ġhamoñ kā shumār

tamāshā-gah-e-lāla-zār!

tamāshā-gah-e-lāla-zār

ab īrāñ kahāñ hai

ye ishqī kā shahkār ''īrān kī rustaḳhez''

ab īrāñ hai ik nauhagar pīr-zāl

hai muddat se afsurda jis kā jamāl

madā.in kī vīrāniyoñ par ajam ashk-rez

vo nau-shervāñ aur zar-dusht aur dāriyūsh

vo farhād shīrīñ vo kai-ḳhusro o kai-qabād

ham ik dāstāñ haiñ vo kirdār the dāstāñ ke!

ham ik kārvāñ haiñ vo sālār the kārvāñ ke!

tah-e-ḳhāk jin ke mazār

tamāshā-gah-e-lāla-zār!

tamāshā-gah-e-lāla-zār

magar nauha-ḳhvānī kī ye sargirānī kahāñ tak?

ki manzil hai dushvār ġham se ġham-e-jāvedāñ tak!

vo sab the kushāda-dil o hosh-mañd o parastār-e-rabb-e-karīm

vo sab ḳhair ke rāh-dāñ rāh-shanās

hameñ aaj mohsin-kush o nā-sipās

vo shāhanshahān-e-āzīm

vo pindār-e-rafta kā jāh-o-jalāl-e-qadīm

hamārī hazīmat ke sab be-bahā tār-o-pū the

fanā un kī taqdīr ham un kī taqdīr ke nauhagar haiñ

usī kī tamannā meñ phir sogvār

tamāshā-gah-e-lāla-zār!

tamāshā-gah-e-lāla-zār

urūs-e-javāñ sāl-e-fardā hijāboñ meñ mastūr

gurisna nigah zūd-kāroñ se ranjūr

magar ab hamāre na.e ḳhvāb kābūs-e-māzī nahīñ haiñ

hamāre na.e ḳhvāb haiñ ādam-e-nau ke ḳhvāb

jahān-e-tag-o-dau ke ḳhvāb

jahān-e-tag-o-dau madā.in nahīñ

kāḳh-e-faġhfūr-o-kisrā nahīñ

ye us ādam-e-nau kā ma.āvā nahīñ

na.ī bastiyāñ aur na.e shahryār

tamāshā-gah-e-lāla-zār!

tamasha-gah-e-lala-zar

tiyatar pe meri nigahen jami thin

mere kan music ke zer-o-bam par lage the

magar mera dil phir bhi karta raha tha

arab aur ajam ke ghamon ka shumar

tamasha-gah-e-lala-zar!

tamasha-gah-e-lala-zar

ab iran kahan hai

ye ishqi ka shahkar iran ki rustaKHez

ab iran hai ek nauhagar pir-zal

hai muddat se afsurda jis ka jamal

madain ki viraniyon par ajam ashk-rez

wo nau-sherwan aur zar-dusht aur dariyush

wo farhad shirin wo kai-KHusro o kai-qabaad

hum ek dastan hain wo kirdar the dastan ke!

hum ek karwan hain wo salar the karwan ke!

tah-e-KHak jin ke mazar

tamasha-gah-e-lala-zar!

tamasha-gah-e-lala-zar

magar nauha-KHwani ki ye sargirani kahan tak?

ki manzil hai dushwar gham se gham-e-jawedan tak!

wo sab the kushada-dil o hosh-mand o parastar-e-rabb-e-karim

wo sab KHair ke rah-dan rah-shanas

hamein aaj mohsin-kush o na-sipas

wo shahanshahan-e-azim

wo pindar-e-rafta ka jah-o-jalal-e-qadim

hamari hazimat ke sab be-baha tar-o-pu the

fana un ki taqdir hum un ki taqdir ke nauhagar hain

usi ki tamanna mein phir sogwar

tamasha-gah-e-lala-zar!

tamasha-gah-e-lala-zar

urus-e-jawan sal-e-farda hijabon mein mastur

gurisna nigah zud-karon se ranjur

magar ab hamare nae KHwab kabus-e-mazi nahin hain

hamare nae KHwab hain aadam-e-nau ke KHwab

jahan-e-tag-o-dau ke KHwab

jahan-e-tag-o-dau madain nahin

kaKH-e-faghfur-o-kisra nahin

ye us aadam-e-nau ka maawa nahin

nai bastiyan aur nae shahryar

tamasha-gah-e-lala-zar!