tanhai

chhā rahī hai muhīb ḳhāmoshī

be-karāñ sī ajiib ḳhāmoshī

vaqf-e-hirmān-o-yās baiThī huuñ

aah kitnī udaas baiThī huuñ

dil meñ kuchh naqsh jagmagāte haiñ

jis tarah ḳhvāb jhilmilāte haiñ

vo sitam-kāriyāñ yagānoñ kī

sard-mehrī vo mehrbānoñ kī

kaḌvī kaḌvī burī burī bāteñ

zahr meñ vo bujhī bujhī bāteñ

chand dam toḌte hue naġhme

chand saa.e se ārzūoñ ke

ziist kī kā.enāt hai saarī

zindagī ek raat hai saarī

raat aur mausam-e-ḳhizāñ kī raat

ranj-o-ālām-e-be-karāñ kī raat

qabr se bhī ziyāda tīra-o-tār

har-nafas ek aarzū kā mazār

tīrgī meñ jahān khoyā sā

dard ik giit meñ samoyā sā

bujh ga.ī sham.a ārzūoñ kī

dil meñ ab daaġh bhī nahīñ koī

aah dushvāriyāñ ġharībī kī

haa.e ḳhuddāriyāñ ġharībī kī

chha rahi hai muhib KHamoshi

be-karan si ajib KHamoshi

waqf-e-hirman-o-yas baiThi hun

aah kitni udas baiThi hun

dil mein kuchh naqsh jagmagate hain

jis tarah KHwab jhilmilate hain

wo sitam-kariyan yaganon ki

sard-mehri wo mehrbanon ki

kaDwi kaDwi buri buri baaten

zahr mein wo bujhi bujhi baaten

chand dam toDte hue naghme

chand sae se aarzuon ke

zist ki kaenat hai sari

zindagi ek raat hai sari

raat aur mausam-e-KHizan ki raat

ranj-o-alam-e-be-karan ki raat

qabr se bhi ziyaada tira-o-tar

har-nafas ek aarzu ka mazar

tirgi mein jahan khoya sa

dard ek git mein samoya sa

bujh gai shama aarzuon ki

dil mein ab dagh bhi nahin koi

aah dushwariyan gharibi ki

hae KHuddariyan gharibi ki