tanhai

mujh sā tanhā nahīñ duniyā meñ ḳhudāyā koī

maiñ na apnā huuñ kisī kā bhī na merā koī

kyā milā mujh ko chahal saala rifāqat karke

ab kisī par na kare aah bharosā koī

tābish-e-hijr ne dil kī ye banā dī sūrat

jaise ho dhuup meñ taptā huā sahrā koī

ātish-e-shauq kī uThtī haiñ kuchh aisī lahreñ

jis tarah aag kā bhaḌkā huā dariyā koī

ek vo din thā ki rotoñ ko hañsā detā thā

ab to rotā huuñ jo dekhā kahīñ hañstā koī

maiñ huuñ nairañgī-e-ālam kī mujassam tasvīr

mujh se behtar nahīñ ibrat kā tamāshā koī

maiñ vo qatra huuñ samundar se jo mahrūm rahā

mujh ko kyā mauj meñ aayā kare dariyā koī

be-ruḳhī aah ye kaisī hai ki is aalam meñ

mile lākhoñ na huā ek bhī apnā koī

mujh sa tanha nahin duniya mein KHudaya koi

main na apna hun kisi ka bhi na mera koi

kya mila mujh ko chahal sala rifaqat karke

ab kisi par na kare aah bharosa koi

tabish-e-hijr ne dil ki ye bana di surat

jaise ho dhup mein tapta hua sahra koi

aatish-e-shauq ki uThti hain kuchh aisi lahren

jis tarah aag ka bhaDka hua dariya koi

ek wo din tha ki roton ko hansa deta tha

ab to rota hun jo dekha kahin hansta koi

main hun nairangi-e-alam ki mujassam taswir

mujh se behtar nahin ibrat ka tamasha koi

main wo qatra hun samundar se jo mahrum raha

mujh ko kya mauj mein aaya kare dariya koi

be-ruKHi aah ye kaisi hai ki is aalam mein

mile lakhon na hua ek bhi apna koi