taqrib-e-ru-numai

kitāb chhap ga.ī chhe rañge title ke saath

tabā.at aur kitābat koī javāb nahīñ

ye rañg aur ye navve gram kā paper

adab ke baab meñ aisī koī kitāb nahīñ

sajī thī bazm-e-pazīrā.ī ek hotel meñ

jahāñ gulāb se chehre to the gulāb nahīñ

kisī vazīr ne is bazm kī sadārat kī

ye baat mujh ko batāne se ijtināb nahīñ

ḳhushā ki bazm meñ hāzir the radio T.V

nizām-e-gardish-e-daurāñ tirā javāb nahīñ

muqarrarīn meñ shāmil the sab haiñ dānish-var

vo hastiyāñ thiiñ jinheñ dekhne kī taab nahīñ

ye kah ke 'ġhālib' o 'momin' kā de diyā darja

adab meñ aisā koī aur āftāb nahīñ

magar kitāb kī taqrīb-e-rū-numā.ī meñ

kitāb chīḳh rahī thī ki maiñ kitāb nahīñ

kitab chhap gai chhe range title ke sath

tabaat aur kitabat koi jawab nahin

ye rang aur ye nawwe gram ka paper

adab ke bab mein aisi koi kitab nahin

saji thi bazm-e-pazirai ek hotel mein

jahan gulab se chehre to the gulab nahin

kisi wazir ne is bazm ki sadarat ki

ye baat mujh ko batane se ijtinab nahin

KHusha ki bazm mein hazir the radio TV

nizam-e-gardish-e-dauran tera jawab nahin

muqarrarin mein shamil the sab hain danish-war

wo hastiyan thin jinhen dekhne ki tab nahin

ye kah ke 'ghaalib' o 'momin' ka de diya darja

adab mein aisa koi aur aaftab nahin

magar kitab ki taqrib-e-ru-numai mein

kitab chiKH rahi thi ki main kitab nahin