tarana-e-urdu

hogī gavāh ḳhāk-e-hindostāñ hamārī

is kī kiyāriyoñ se phūTī zabāñ hamārī

hindū hoñ yā musalmāñ īsā.ī hoñ ki sikh hoñ

urdu zabāñ ke ham haiñ urdu zabāñ hamārī

marnā bhī saath is ke jiinā bhī saath is ke

ham is ke haiñ muhāfiz ye pāsbāñ hamārī

'ḳhusrav' 'kabīr' 'tulsī' 'ġhālib' kī haiñ amānat

kyā be-nishān hogī pyārī zabāñ hamārī

qand-o-nabāt se hai baḌh kar miThās is kī

har daur meñ rahī hai ye dilsitāñ hamārī

is meñ tañke hue haiñ kitne hasīñ sitāre

qaumoñ kī kahkashāñ hai urdu zabāñ hamārī

phir chāhtā hai is ko daur-e-jahāñ miTānā

hogī raqam lahū se phir dāstāñ hamārī

haiñ jaañ se bhī ziyāda ham ko aziiz donoñ

hindostāñ hamārā urdu zabāñ hamārī

vo bhī to ek din thā ham mīr-e-kārvāñ the

taqlīd kar rahā thā har kārvāñ hamārī

ham to har ik zabāñ ko dete haiñ pyaar apnā

phir kis liye miTā.e koī zabāñ hamārī

ham zabt kī hadoñ se aage nikal chuke haiñ

kab tak ye āzmā.ish ai āsmāñ hamārī

'ejāz' mil ke gaa.eñ urdu kā sab tarāna

gūñje fazā meñ har-sū urdu zabāñ hamārī

hogi gawah KHak-e-hindostan hamari

is ki kiyariyon se phuTi zaban hamari

hindu hon ya musalman isai hon ki sikh hon

urdu zaban ke hum hain urdu zaban hamari

marna bhi sath is ke jina bhi sath is ke

hum is ke hain muhafiz ye pasban hamari

'KHusraw' 'kabir' 'tulsi' 'ghaalib' ki hain amanat

kya be-nishan hogi pyari zaban hamari

qand-o-nabaat se hai baDh kar miThas is ki

har daur mein rahi hai ye dilsitan hamari

is mein tanke hue hain kitne hasin sitare

qaumon ki kahkashan hai urdu zaban hamari

phir chahta hai is ko daur-e-jahan miTana

hogi raqam lahu se phir dastan hamari

hain jaan se bhi ziyaada hum ko aziz donon

hindostan hamara urdu zaban hamari

wo bhi to ek din tha hum mir-e-karwan the

taqlid kar raha tha har karwan hamari

hum to har ek zaban ko dete hain pyar apna

phir kis liye miTae koi zaban hamari

hum zabt ki hadon se aage nikal chuke hain

kab tak ye aazmaish ai aasman hamari

'ejaz' mil ke gaen urdu ka sab tarana

gunje faza mein har-su urdu zaban hamari