targhib

chilmanoñ ke us taraf jagmagātī zindagī

sāmne aa kar naqāb-e-ruḳh ko sarkātī huī

mujh se hañs kar kah rahī hai merā dāman thaam le

Dūbte taare numūd-e-sub.h se sahme hue

malgajī dhundlāhaToñ meñ jhilmilā kar kho ga.e

jāgtī āñkhoñ meñ ik guzrī huī duniyā liye

is taraf maiñ huuñ mire maazī kī baḌhtī dhund hai

dhuñdle dhuñdle naqsh lā-hāsil tamannāoñ kī raakh

raushnī ke dā.ere se duur yādoñ kā ḳhumār

ik taraf jaltī fasīloñ se dhuāñ uThtā huā

ik taraf āsūdgī-e-ārzū ke narm ḳhvāb

ḳham-ba-ḳham rāheñ safar kī gard meñ khoī huī

jaltī āñkhoñ meñ sunahre ḳhvāb-zāroñ ke sarāb

roz-o-shab ke jalte-bujhte dā.eroñ ko toḌ kar

aarzū kī vus.ateñ sahrā-ba-sahrā be-kanār

nā-tarāshīda chaTāneñ rāsta roke hue

ik sadā-e-bā-gasht apnī navāoñ kā javāb

ashk-hā-e-sub.h-gāhī se sahar khiltī huī

raat kī tārīkiyāñ dil ke lahū se lāla-zār

ek soz-e-ārzū anfās meñ rachtā huā

ek mub.ham dard dil kī ḳhalvatoñ meñ be-qarār

bas yahī sub.heñ yahī shāmeñ yahī be-nām dard

umr bhar kī jidd-o-johd-e-shauq kā hāsil rahe

tīra-baḳht āñkhoñ meñ aise ḳhvāb ke paikar base

jin se muñh moḌūñ to har āsā.ish-e-duniyā mile

chilmanoñ ke is taraf se jagmagātī zindagī

sāmne aa kar naqāb-e-ruḳh ko sarkātī huī

mujh se hañs kar kah rahī hai merā dāman thaam le

chilmanon ke us taraf jagmagati zindagi

samne aa kar naqab-e-ruKH ko sarkati hui

mujh se hans kar kah rahi hai mera daman tham le

Dubte tare numud-e-subh se sahme hue

malgaji dhundlahaTon mein jhilmila kar kho gae

jagti aankhon mein ek guzri hui duniya liye

is taraf main hun mere mazi ki baDhti dhund hai

dhundle dhundle naqsh la-hasil tamannaon ki rakh

raushni ke daere se dur yaadon ka KHumar

ek taraf jalti fasilon se dhuan uThta hua

ek taraf aasudgi-e-arzu ke narm KHwab

KHam-ba-KHam rahen safar ki gard mein khoi hui

jalti aankhon mein sunahre KHwab-zaron ke sarab

roz-o-shab ke jalte-bujhte daeron ko toD kar

aarzu ki wusaten sahra-ba-sahra be-kanar

na-tarashida chaTanen rasta roke hue

ek sada-e-ba-gasht apni nawaon ka jawab

ashk-ha-e-subh-gahi se sahar khilti hui

raat ki tarikiyan dil ke lahu se lala-zar

ek soz-e-arzu anfas mein rachta hua

ek mubham dard dil ki KHalwaton mein be-qarar

bas yahi subhen yahi shamen yahi be-nam dard

umr bhar ki jidd-o-johd-e-shauq ka hasil rahe

tira-baKHt aankhon mein aise KHwab ke paikar base

jin se munh moDun to har aasaish-e-duniya mile

chilmanon ke is taraf se jagmagati zindagi

samne aa kar naqab-e-ruKH ko sarkati hui

mujh se hans kar kah rahi hai mera daman tham le