tasalsul

kab se sunsān ḳharāboñ meñ paḌā thā ye jahāñ

kab se ḳhvābīda the is vādī-e-ḳhārā ke sanam

kis ko ma.alūm ye sadiyoñ ke pur-asrār bharam

kaun jaane ki ye patthar bhī kabhī the insāñ

sirf lab-doḳht parbat haiñ jahāñ nauha-kunāñ

na dar-o-bām na dīvār o darīcha koī

koī dahlīz-e-shikasta na harīm-e-vīrāñ

shahr ke shahr haiñ pātāl ke dāman meñ nihāñ

kaun pahchāntā zulmat haiñ siyāhī ke nishāñ

jo nazar DhūñDne uTThī vo nazar bhī khoī

chashm-e-mahtāb bhī shabnam kī jagah ḳhuuñ roī

ilm ne aaj kurede haiñ vo zulmāt ke Dher

vaqt ne jis pe biThā.e the fanā ke pahre

jaag uThe sūr-e-sarāfīl se gūñge bahre

tā-abad jin ke muqaddar meñ thī duniyā andher

ye magar azmat-e-insāñ hai ki taqdīr ke pher?

ye imārāt, ye mīnār, ye gulzār, ye khet

toda-e-ḳhāk se hastī ne liyā taaza janm

jī uThe vādī-e-ḳhāmosh ke be-jān sanam

phir koī chīregā zarre kā jigar qatra-e-yam

dafn kar degā jo ḳhāliq ko bhī maḳhlūq samet

aur ye ābādiyāñ ban jā.eñgī phir ret hī ret

kab se sunsan KHarabon mein paDa tha ye jahan

kab se KHwabida the is wadi-e-KHara ke sanam

kis ko malum ye sadiyon ke pur-asrar bharam

kaun jaane ki ye patthar bhi kabhi the insan

sirf lab-doKHt parbat hain jahan nauha-kunan

na dar-o-baam na diwar o daricha koi

koi dahliz-e-shikasta na harim-e-viran

shahr ke shahr hain patal ke daman mein nihan

kaun pahchanta zulmat hain siyahi ke nishan

jo nazar DhunDne uTThi wo nazar bhi khoi

chashm-e-mahtab bhi shabnam ki jagah KHun roi

ilm ne aaj kurede hain wo zulmat ke Dher

waqt ne jis pe biThae the fana ke pahre

jag uThe sur-e-sarafil se gunge bahre

ta-abad jin ke muqaddar mein thi duniya andher

ye magar azmat-e-insan hai ki taqdir ke pher?

ye imaraat, ye minar, ye gulzar, ye khet

toda-e-KHak se hasti ne liya taza janm

ji uThe wadi-e-KHamosh ke be-jaan sanam

phir koi chirega zarre ka jigar qatra-e-yam

dafn kar dega jo KHaliq ko bhi maKHluq samet

aur ye aabaadiyan ban jaengi phir ret hi ret