tashkil-e-sheristan ke baad

maan lī sarkār ne jab maañg sheristān kī

shā.iroñ ne saañs lī tab jā ke itmīnān kī

purkashish thā is qadar un ke liye taaza vatan

chhoḌ kar ābā.ī ghar jaane lage ahl-e-suḳhan

'amn' 'mullā' 'arsh' 'sāġhar' 'vajd' 'jazbī' aur 'firāq'

apnā apnā qāfila le kar chale bā-tamtarāq

band kar dī 'sāhir'o-'sardār' ne filmī dukāñ

le ke nikle inqilābī shā.iroñ kā kārvāñ

saath 'alvī' ko liye nikle 'ḳhalīl'-o-'shahryār'

aage pīchhe kul jadīdī the qatār-andar-qatār

gungunāte giit gaate 'bekal' utsāhī chale

tanziya ash.ār kahte 'furqat'-o-'vāhī' chale

yūñhī saare mulk se kul shā'irān-e-har-zabāñ

sū-e-manzil chal paḌe le le ke apnī Toliyāñ

sāl-bhar meñ shā.iroñ se mulk ḳhālī ho gayā

inḳhilā un kā mukammal aur misālī ho gayā

aam taḳhmīne ke rū se un kī ta.adād-o-shumār

tūl-o-arz-e-mulk meñ thī do karoḌ iksaTh hazār

naql-e-ābādī ke is tārīḳh-sāz iqdām se

kuchh masā.il hal hue kuchh mas.ale paidā hue

uTh ga.ī jab mulk se ash.ār-sāzoñ kī barāt

kuchh ġhizā.ī mushkiloñ se qaum ne paa.ī najāt

daf.atan be-rozgārī kī vabā bhī kam huī

zor shorish kā ghaTā sarkār mustahkam huī

family mansūba-bandī kī zarūrat ghaT ga.ī

bāp-māñ par thī jo pābandī vo fauran haT ga.ī

man li sarkar ne jab mang sheristan ki

shairon ne sans li tab ja ke itminan ki

purkashish tha is qadar un ke liye taza watan

chhoD kar aabai ghar jaane lage ahl-e-suKHan

'amn' 'mulla' 'arsh' 'saghar' 'wajd' 'jazbi' aur 'firaq'

apna apna qafila le kar chale ba-tamtaraq

band kar di 'sahir'o-'sardar' ne filmi dukan

le ke nikle inqilabi shairon ka karwan

sath 'alwi' ko liye nikle 'KHalil'-o-'shahryar'

aage pichhe kul jadidi the qatar-andar-qatar

gungunate git gate 'bekal' utsahi chale

tanziya ashaar kahte 'furqat'-o-'wahi' chale

yunhi sare mulk se kul sha'iran-e-har-zaban

su-e-manzil chal paDe le le ke apni Toliyan

sal-bhar mein shairon se mulk KHali ho gaya

inKHila un ka mukammal aur misali ho gaya

aam taKHmine ke ru se un ki tadad-o-shumar

tul-o-arz-e-mulk mein thi do karoD iksaTh hazar

naql-e-abaadi ke is tariKH-saz iqdam se

kuchh masail hal hue kuchh masale paida hue

uTh gai jab mulk se ashaar-sazon ki baraat

kuchh ghizai mushkilon se qaum ne pai najat

dafatan be-rozgari ki waba bhi kam hui

zor shorish ka ghaTa sarkar mustahkam hui

family mansuba-bandi ki zarurat ghaT gai

bap-man par thi jo pabandi wo fauran haT gai