tasma-e-pa

kab se ye bār-e-garāñ

apne kāñdhoñ pe uThā.e hue tanhā tanhā

gasht kartā huuñ maiñ hairāñ hairāñ

maiñ ne har-chand chhuḌānā chāhā

aur mazbūt huī us kī gulū-gīr giraft

aur sañgīn huā jism-e-javāñ par pahra

sāmne fāsla-e-lāmatanāhī

dil meñ saikaḌoñ man chale armānoñ ke rañgīn charāġh

jin kī ḳhushbū se mo.attar hai dimāġh

jin se mumkin hai ki mil jaa.e mujhe

gum-shuda jannat kā surāġh

kab se kāñdhoñ pe uThā.e hue hairāñ hairāñ

vaqt kā bār-e-garāñ

sochtā huuñ ki agar

is ke pairoñ ke shikanje se nikal pā.ūñ maiñ

be-karāñ arsa-e-hastī meñ bikhar jā.ūñ maiñ

kab se ye bar-e-garan

apne kandhon pe uThae hue tanha tanha

gasht karta hun main hairan hairan

main ne har-chand chhuDana chaha

aur mazbut hui us ki gulu-gir giraft

aur sangin hua jism-e-jawan par pahra

samne fasla-e-lamatanahi

dil mein saikaDon man chale armanon ke rangin charagh

jin ki KHushbu se moattar hai dimagh

jin se mumkin hai ki mil jae mujhe

gum-shuda jannat ka suragh

kab se kandhon pe uThae hue hairan hairan

waqt ka bar-e-garan

sochta hun ki agar

is ke pairon ke shikanje se nikal paun main

be-karan arsa-e-hasti mein bikhar jaun main