telewision

television ahd-e-hāzir kā ik aflātūn hai

lag gayā hai jo hamāre muñh ko ye vo ḳhuun hai

is tarah television kā har drama ho gayā

jaise lāzim shervānī par pajāma ho gayā

ishtihār is tarah lāzim hai ḳhabar-nāme ke ba.ad

jaise ful-stop kī maujūdgī comme ke ba.ad

ik Darāma nashr hotā hai jo aadhī raat meñ

vo bahut maqbūl hai is ahd ke jinnāt meñ

jis jagah Time bachā thoḌā sā gaanā de diyā

raat ke bāra-baje qaumī tarāna de diyā

mahfil-e-she.arī ko aadhī raat meñ bhugtā diyā

bhairvīñ kā raag paune-nau-baje chipkā diyā

aaj phir fannī ḳharābī ho ga.ī do-chār baar

intizār o intizār o intizār o intizār

television ho gayā sañgīn biivī kī tarah

aur biivī ho ga.ī rañgīn T.V kī tarah

telewision ahd-e-hazir ka ek aflatun hai

lag gaya hai jo hamare munh ko ye wo KHun hai

is tarah telewision ka har drama ho gaya

jaise lazim sherwani par pajama ho gaya

ishtihaar is tarah lazim hai KHabar-name ke baad

jaise ful-stop ki maujudgi comme ke baad

ek Darama nashr hota hai jo aadhi raat mein

wo bahut maqbul hai is ahd ke jinnat mein

jis jagah Time bacha thoDa sa gana de diya

raat ke bara-baje qaumi tarana de diya

mahfil-e-sheari ko aadhi raat mein bhugta diya

bhairwin ka rag paune-nau-baje chipka diya

aaj phir fanni KHarabi ho gai do-chaar bar

intizar o intizar o intizar o intizar

telewision ho gaya sangin biwi ki tarah

aur biwi ho gai rangin TV ki tarah