tere KHaton ki KHushbu

tere ḳhatoñ kī ḳhushbū

hāthoñ meñ bas ga.ī hai sāñsoñ meñ rach rahī hai

ḳhvāboñ kī vus.atoñ meñ ik dhuum mach rahī hai

jazbāt ke gulistāñ mahkā rahī hai har sū

tere ḳhatoñ kī ḳhushbū

tere ḳhatoñ kī mujh par kyā kyā ināyateñ haiñ

be-mudda.ā karam hai bejā shikāyateñ haiñ

apne hī qahqahoñ par barsā rahī hai aañsū

tere ḳhatoñ kī ḳhushbū

terī zabān ban kar aksar mujhe sunā.e

bāteñ banī banā.ī jumle raTe-raTā.e

mujh par bhī kar chukī hai apnī vafā kā jaadū

tere ḳhatoñ kī ḳhushbū

samjhe haiñ kuchh usī ne ādāb chāhatoñ ke

sab ke liye vahī haiñ alqāb chāhatoñ ke

sab ke liye barābar phailā rahī hai baazū

tere ḳhatoñ kī ḳhushbū

apne sivā kisī ko maiñ jāntā nahīñ thā

suntā thā laakh bāteñ aur māntā nahīñ thā

ab ḳhud nikāl laa.ī begānagī ke pahlū

tere ḳhatoñ kī ḳhushbū

kyā jaane kis taraf ko chupke se muḌ chukī hai

gulshan ke par lagā kar sahrā ko uḌ chalī hai

rokā hazār maiñ ne aa.ī magar na qaabū

tere ḳhatoñ kī ḳhushbū

tere KHaton ki KHushbu

hathon mein bas gai hai sanson mein rach rahi hai

KHwabon ki wusaton mein ek dhum mach rahi hai

jazbaat ke gulistan mahka rahi hai har su

tere KHaton ki KHushbu

tere KHaton ki mujh par kya kya inayaten hain

be-muddaa karam hai beja shikayaten hain

apne hi qahqahon par barsa rahi hai aansu

tere KHaton ki KHushbu

teri zaban ban kar aksar mujhe sunae

baaten bani banai jumle raTe-raTae

mujh par bhi kar chuki hai apni wafa ka jadu

tere KHaton ki KHushbu

samjhe hain kuchh usi ne aadab chahaton ke

sab ke liye wahi hain alqab chahaton ke

sab ke liye barabar phaila rahi hai bazu

tere KHaton ki KHushbu

apne siwa kisi ko main jaanta nahin tha

sunta tha lakh baaten aur manta nahin tha

ab KHud nikal lai beganagi ke pahlu

tere KHaton ki KHushbu

kya jaane kis taraf ko chupke se muD chuki hai

gulshan ke par laga kar sahra ko uD chali hai

roka hazar main ne aai magar na qabu

tere KHaton ki KHushbu