tere siwa

sochtā huuñ ki tire pyaar ke badle mujh ko

kyā milā dard-o-ġham-o-ranj-o-musībat ke sivā

ik taḌap ek kasak ek ḳhalish hai paiham

ek lamha bhī sukūñ kā na mire paas rahā

aur tū ajnabī āġhosh kī zīnat ban kar

ik chamaktī huī firdaus meñ jā baiThī hai

raqs karte haiñ na.e ḳhvāb nigāhoñ meñ tirī

dil se maazī ke sabhī naqsh miTā baiThī hai

merī mahbūb mire dil ke siyah-ḳhāne meñ

jhilmilātī haiñ tirī yaad kī sham.eñ ab bhī

āhaTeñ terī tasavvur meñ basī haiñ ab tak

tere jalvoñ se sajī haiñ mirī nazreñ ab bhī

merī taḳh.īl ke ḳhvābīda darīchoñ se abhī

terī paa.el ke chhanakne kī sadā aatī hai

mere ehsās pe lahrātī haiñ zulfeñ terī

jab kabhī jhuum ke sāvan kī ghaTā aatī hai

maiñ ne har chand tujhe bhūlnā chāhā lekin

phir bhī āñkhoñ meñ tire ḳhvāb machal jaate haiñ

ab talak bhī mirī fikroñ ke tarāshīda ḳhutūt

jaane kyuuñ tere ḳhad-o-ḳhāl meñ Dhal jaate haiñ

ab ye sochā hai ki phir dil meñ samo lūñgā tujhe

jazb kar lūñgā nigāhoñ meñ tire naqsh-e-hasīñ

kyūñki shāyad mirī taḳhlīq mire fan kā suhāg

tujh se hai terī qasam tere sivā kuchh bhī nahīñ

sochta hun ki tere pyar ke badle mujh ko

kya mila dard-o-gham-o-ranj-o-musibat ke siwa

ek taDap ek kasak ek KHalish hai paiham

ek lamha bhi sukun ka na mere pas raha

aur tu ajnabi aaghosh ki zinat ban kar

ek chamakti hui firdaus mein ja baiThi hai

raqs karte hain nae KHwab nigahon mein teri

dil se mazi ke sabhi naqsh miTa baiThi hai

meri mahbub mere dil ke siyah-KHane mein

jhilmilati hain teri yaad ki shamen ab bhi

aahaTen teri tasawwur mein basi hain ab tak

tere jalwon se saji hain meri nazren ab bhi

meri taKHil ke KHwabida darichon se abhi

teri pael ke chhanakne ki sada aati hai

mere ehsas pe lahraati hain zulfen teri

jab kabhi jhum ke sawan ki ghaTa aati hai

main ne har chand tujhe bhulna chaha lekin

phir bhi aankhon mein tere KHwab machal jate hain

ab talak bhi meri fikron ke tarashida KHutut

jaane kyun tere KHad-o-KHal mein Dhal jate hain

ab ye socha hai ki phir dil mein samo lunga tujhe

jazb kar lunga nigahon mein tere naqsh-e-hasin

kyunki shayad meri taKHliq mere fan ka suhag

tujh se hai teri qasam tere siwa kuchh bhi nahin