tezab, aakar KHushbu ka

niibū pahāḌī ke dāman meñ

ek gaañv hai

'madrāban'

jahāñ meñ paidā huā thā

(merā naam mohamād-fārūq hai)

merī maañ seb ki tarah surḳh aur mīThī thī

gulāb ki tarah komal aur mo.attar

vo ḳhushbū kā ākār thī

lagī lipTī chhal-kapaT jhuuT

ye lafz us ne sune to the

āzmā.e nahīñ the

dohrā.e nahīñ the

radio se nizār-qabānī kā qasīda-e-mutavahashshiya nashr hotā hai

yā koī muġhannī kālīdās kā rītū-samhār sunātā

to vo phuuT phuuT kar rotī

maiñ pūchhtā rone kā kāran

to kahtī

devtāoñ kī in zabānoñ meñ

jaadū kā asar hai

in meñ saty kī dishā

aur sirāt-al-mustaqīm kī nishān-dahī hai

maiñ bār-hā us kī sādgī par ro detā

merā baap dāñtoñ meñ dynamite dabā.e

uñgliyoñ ke poroñ meñ tezāb ke ban ugātā hai

aur piile murda mariyal kāġhaz ke chehre par

lahū ke phuul kāḌhtā hai

ḳhud se alag ho kar ḳhud par miT kar

apnī jā.edād se pyaar karne lagtā hai

vo aaTh jahāzoñ kā mālik hai

jo us ne vaqt ke samundar ke pāniyoñ par utaar diye haiñ

aur ḳhud ek control-rōm meñ baiTh kar

un kī harkāt kā ta.ayyun kartā hai

maiñ bhī us kā ek jahāz huuñ

patthar chabānā, palkoñ kī jhāḌiyoñ par sidra ugānā

sub.h-savere masjid ke darvāze par ḳhudā se

āñkheñ churā kar guzar jaanā

aur ḳhudā ke mahbūb par farefta ho kar

ḳhudā se raqābat baañT lenā

us kī adā ban gayā hai

maiñ surḳh mīThe seb aur tezāb ke isī

imtizāj kī paidā-vār huuñ

maiñ kaun huuñ

nibu pahaDi ke daman mein

ek ganw hai

'madraban'

jahan mein paida hua tha

(mera nam mohamad-faruq hai)

meri man seb ki tarah surKH aur miThi thi

gulab ki tarah komal aur moattar

wo KHushbu ka aakar thi

lagi lipTi chhal-kapaT jhuT

ye lafz us ne sune to the

aazmae nahin the

dohrae nahin the

radio se nizar-qabani ka qasida-e-mutawahashshiya nashr hota hai

ya koi mughanni kalidas ka ritu-samhaar sunata

to wo phuT phuT kar roti

main puchhta rone ka karan

to kahti

dewtaon ki in zabanon mein

jadu ka asar hai

in mein saty ki disha

aur siraat-al-mustaqim ki nishan-dahi hai

main bar-ha us ki sadgi par ro deta

mera bap danton mein dynamite dabae

ungliyon ke poron mein tezab ke ban ugata hai

aur pile murda mariyal kaghaz ke chehre par

lahu ke phul kaDhta hai

KHud se alag ho kar KHud par miT kar

apni jaedad se pyar karne lagta hai

wo aaTh jahazon ka malik hai

jo us ne waqt ke samundar ke paniyon par utar diye hain

aur KHud ek control-room mein baiTh kar

un ki harkat ka tayyun karta hai

main bhi us ka ek jahaz hun

patthar chabana, palkon ki jhaDiyon par sidra ugana

subh-sawere masjid ke darwaze par KHuda se

aankhen chura kar guzar jaana

aur KHuda ke mahbub par farefta ho kar

KHuda se raqabat banT lena

us ki ada ban gaya hai

main surKH miThe seb aur tezab ke isi

imtizaj ki paida-war hun

main kaun hun