tham gai tal anfas ki

vo ek fankār thā

jis kī āvāz barsoñ talak

mohabbat ke naġhme sunātī rahī

amn ke giit gaatī rahī

jis kī āvāz se sur mukammal hue

jis kī āvāz ne lai ko baḳhshī jilā

us kī āvāz paiġhām-e-sub.h-e-masarrat bhī thī

us kī āvāz ik dard-e-shām-e-ġharībāñ bhī thī

vo ek fankār thā

vaqt ke saaz par gā rahā thā ġhazal

muskurāne lagī jis ko sun ke ajal

tham ga.ī taal anfās kī

dam-ba-ḳhud saare sur rah ga.e

jhilmilāne lagī sham.a-e-lutf-o-surūr

ahl-e-mahfil sabhī nauha-ḳhvāñ ho ga.e

aur vo mutrib-e-dil-barāñ

sab ko mahv-e-alam chhoḌ kar

so gayā dā.imī niiñd kī narm āġhosh meñ

wo ek fankar tha

jis ki aawaz barson talak

mohabbat ke naghme sunati rahi

amn ke git gati rahi

jis ki aawaz se sur mukammal hue

jis ki aawaz ne lai ko baKHshi jila

us ki aawaz paigham-e-subh-e-masarrat bhi thi

us ki aawaz ek dard-e-sham-e-ghariban bhi thi

wo ek fankar tha

waqt ke saz par ga raha tha ghazal

muskurane lagi jis ko sun ke ajal

tham gai tal anfas ki

dam-ba-KHud sare sur rah gae

jhilmilane lagi shama-e-lutf-o-surur

ahl-e-mahfil sabhi nauha-KHwan ho gae

aur wo mutrib-e-dil-baran

sab ko mahw-e-alam chhoD kar

so gaya daimi nind ki narm aaghosh mein